Жолоочийг нойрмоглохоос сэргийлэх дохиоллын системийг туршиж эхэллээ хэмээн ОХУ-ын Тээврийн яам мэдээллээ.

Энэ систем нь жолоочийн биеийн байдлыг хянаж, жолоо барьж байхдаа сонор сэрэмж алдах, зүүрмэглэхээс сэргийлэх зорилготой хэмээн Тээврийн яамны хэвлэлийн алба РИА Новости-д мэдээлжээ.

Туршилтыг Татарстан болон Белгород, Москва, Калуга, Рязань, Омск мужуудад эхлүүлсэн байна.

Туршилтын үр дүнгээр замын хөдөлгөөнд болон жолооч нарт тавигдах нөхцөл шаардлагуудыг шинэчлэх боломж бүрдэнэ хэмээн тооцоолж байгаа ажээ.

"Жолоочийн бугуйнд бугуйвч зүүлгэж судасны цохилт, арьсны идэвхтэй байдлыг хянана. Хэрвээ жолооч зүүрмэглэвэл дохио дуугарна. Мөн хяналтын камерыг ашиглана” хэмээн Тээврийн яамны Тоон шилжилтийн газрын дарга Дмитрий Баканов ярьжээ.

Статистик үзүүлэлтээр гарч байгаа зам тээврийн ослын тал хувь нь жолоочийн буруутай үйлдлээс шалтгаалдаг байна.

Эх сурвалж: РИА НОВОСТИ