Бенди буюу бөмбөгтэй хоккейн дэлхийн аварга шалгаруулах тэмцээний  В дивизоны тоглолтууд энэ сарын 1-6-ны хооронд ОХУ-ын Эрхүү хотод зохион байгуулагдаж байна. Энэ удаагийн бендигийн ДАШТ-ний В дивизонд 10 баг хоёр хэсэгт хуваагдан Иркутск мужийн хоёр томоохон хотын дөрвөн цэнгэлдэхэд өрсөлдөж байна.

Тус тэмцээний өмнөхөн Хятадын шигшээ баг шинэ коронавирусийн улмаас нэрээ татсан бол Их Британийн шигшээ баг визний асуудлаас болж оролцож чадахааргүй болжээ. Монгол улсын баг тамирчдын хувьд тус тэмцээний В хэсэгт Словак, Латви, Япон, Сомали зэрэг багуудтай нэг хэсэгт оржээ. Эхний тоглолтоо Монгол улсын шигшээ баг Сомали улсын шигшээ багтай хийж 10-0, дараагийн тоглолтоо Словак улсын шигшээ багтай хийж 4-0, хэсгийн гуравдах тоглолтоо Японы шигшээ багтай хийж 2-1, хэсгийн сүүлийн тоглолтоо Латвийн шигшээ багтай хийж 2-0 гэсэн харьцаатай тус тус хожиж хэсэгтээ ганц ч хожигдолгүй 4 хожин итгэл төгс хасагдах шатанд шалгарлаа.

Хасагдах шатанд Монгол улсын бөмбөгтэй хоккейн баг Чехийн шигшээ багтай учраа таарлаа. Тоглолт маргааш/2020.03.04/ Иркутск хотын Труд цэнгэлдэх хүрээлэнд явагдана.