“COVID-19” коронавирусийн халдвар Тунис, Нигери, Сенегал зэрэг Африкийн орнуудад анхны тохиолдол бүртгэдсэнээр нийт 76 улс оронд халдвар тархаад байна. Нийт халдвар авсан хүний тоо өнөөдөр /2020.03.03/-ийн байдлаар 90,925 болсон бол эдгэсэн хүний тоо 48,137 байна. Харин уг халдварын улмаас 3,125 хүн нас баржээ. Хятад улсад 125 шинэ тохиолдол бүртгэгдэж, 31 хүн нас баржээ.

АНУ-ын Вашингтон муж улсад коронавирусийн халдвар авсан дөрвөн хүн нас барснаар тус улсад уг халдварын улмаас нас барсан хүний тоо зургаа болжээ. Тус улсын эрүүл мэндийн байгууллагын мэдээлснээр, АНУ-д коронавирусийн халдвар авсан хүний тоо 102-т хүрсэн байна. Тэдний 48 нь бусад орноос нүүлгэн шилжүүлж авчирсан иргэд бол үлдсэн 54 нь 11 муж улсад бүртгэгдсэн байна.

Халдварын ихэнх тохиолдлууд хөнгөн шинжээр илэрч байгаа бол архаг хууч өвчтэй хүмүүс болон өндөр настнуудын амь насанд аюул учруулж байгааг онцолсон байна.

Харин Хятадын эх газраас гадна халдварын голомт болоод буй Өмнөд Солонгост халдвар авсан хүний тоо 4,812 байгаа бол нас барсан хүний тоо 28 болж нэмэгджээ. Сүүлийн өдрүүдэд коронавирусийн халдвар эрчимтэй нэмэгдэж байгаа Итали улсад 2,036 хүн халдвар авч, 52 хүн нас барсан байна. Иранд өнөөдрийн байдлаар 1,501 хүн халдвар авч, 66 хүн нас бараад байна.  Халдварын тоо өндөр байгаа Япон улсад 274 хүн халдвар авч, зургаан хүн нас барсан гэж албан мэдээнд дурджээ. Мөн үүн дээр тус улсад хөл хорионд орсон “Diamond Princess” аяллын хөлөг дээр халдвар авсан 705 хүн, нас барсан долоон хүн нэмэгдэж байгаа юм. Халдварын тоогоор эдгээр улсуудын араас Франц, Герман, Сингапур, АНУ зэрэг улсууд жагсч байна.

Эх сурвалж: WORLDOMETERS