БНСУ-д халдвар авсан хүний тоо 315-аар нэмэгдлээ

НЭМЭЛТ: 16.00 ЦАГ

Өмнөд Солонгост коронавирусийн халдвар авсан хүний тоо өнөөдөр өглөөний /2020.02.28/ 09.00 цагийн байдлаар 2,022 байсан бол 17.00 цагийн байдлаар 315 хүн нэмэгдэж 2337 боллоо. Эдгэсэн хүний тоо 27, нас барсан хүний тоо 13 байна.

Тархалтын голомт болоод байгаа Тэгү хотод тус улсын Ерөнхий сайд Жон Сэ Кюн ажиллаж байгаа ба тус хотод амны хаалтны эрэлт огцом өсч байна. Одоогоор нийт халдвар авсан иргэдийн 80 хувь нь Тэгү, хөрш зэргэлдээ Гёнбук хотод байгаа юм. Шинээр халдвар авсан хүмүүсийн дотор тус улсын хамгийн том автомашин үйлдвэрлэгч "Hyundai Motor" компанийн үйлдвэрийн ажилтан байсан учир тус компани Улсан хот дахь үйлдвэрээ хаажээ.

Мөн тус улсын Засгийн газар халдварын тархалтыг зогсоохын тулд хөл хориог санаатай зөрчсөн иргэнийг нэг жил хүртэл хорих, эсвэл 10 сая воноор торгох хуулийг баталжээ. Түүнчлэн шинжилгээг зөвхөн тухайн иргэний зөвшөөрлөөр авдаг байсан бол одоо эсрэгээрээ иргэн заавал шинжилгээ өгөх үүрэгтэй болсон байна.

Коронгавирусийн халдвар огцом нэмэгдэж байгаатай холбогдуулан олон улсын цэргийн сургуулилалт, BTS хамтлагийн тоглолт цуцлагджээ

ӨМНӨД СОЛОНГОСТ ХАЛДВАР АВСАН ХҮНИЙ ТОО 2,000 ДАВЛАА

Өмнөд Солонгост өнөөдөр /2020.02.28/-ийн байдлаар нэг шөнийн дотор коронавирусийн 256 шинэ тохиолдол бүртгэгдэж нийт халдварын тоо 2,022 болжээ. Нас барсан хүний тоо 13 байна. Шинээр бүртгэгдсэн халдварын талаас илүү хувь нь буюу 182 хүн зүүн өмнөд хэсгийн Тэгү хотод байрладаг Шинчонжи сүмтэй холбоотой хүмүүс байгаа бол 49 нь хөрш зэргэлдээ хойд Кёнсон мужийн иргэд байгаа юм. Мөн Сөүлд дахин зургаан тохиолдол бүртгэгдсэн гэж тус улсын Өвчний хяналт, урьдчилан сэргийлэх төв (KCDC) мэдэгдлээ.

Мэргэжилтнүүдийн үзэж байгаагаар ойрын өдрүүдэд халдварын тархалт үргэлжлэн нэмэгдэх төлөвтэй байгаа тул эрүүл мэндийн байгууллагууд бусад хот тосгодод амьдардаг Христийн шашны Шинчонжи сүмийн 210 мянга гаруй гишүүнийг шинжилгээнд хамруулахаар ажиллаж байгаа аж. Тус улсын хувьд халдварын голомт нь энэхүү сүм болоод байгаа билээ.

Covid-19 халдварын улмаас тус улсад болох байсан АНУ-БНСУ-ын хамтарсан цэргийн сургуулилт хойшлогдож, тус улсад суралцдаг гадаад оюутнууд нутаг буцаж эхэлжээ. Түүнчлэн халдвар огцом хурдацтай тархах болсонд ард иргэд нь Ерөнхийлөгч Мүн Жэ Инийг зохион байгуулалт муутай ажилласных хэмээн буруутгаж түүнийг огцруулах саналд нэг сая гаруй иргэн гарын үсэг зурсан байна.

Эх сурвалж: KOREATIMES