ОХУ-д сармисны үнэ огцом өссөн байна. Зарим хэвлэлд мэдээлснээр, 2020 оны нэгдүгээр сард худалдаалагдсан сармисны үнийг өнгөрсөн оны мөн үеийнхтэй харьцуулахад 37 хувиар өссөн үзүүлэлттэй гарчээ. Энэ нь коронавирусийн дэгдэлтээс үүдэлтэй бөгөөд хүмүүс сармис вирус устгах өндөр чадвартай гэдэгт итгэдэгтэй холбоотой аж.

Мөн мэргэжилтнүүдийн үзэж буйгаар тус улсад ирэх зургаан сарын хугацаанд уламжлалт анагаах ухаанд өргөнөөр ашигладаг бүтээгдэхүүнүүд болох гич, гаа, зөгийн балны эрэлт өндөр байхын хэрээр үнэ нь ч өсөх төлөвтэй байгаа талаар Газета.ру цахим хуудаст мэдээлжээ.

Сармисны ашиг тус их. Ханиад томууг дарах хамгийн сайн эм бол сармис гэдгийг бид бүгд мэддэг. Учир нь сармисанд маш олон төрлийн аминдэм, биед ашигтай тослог, амино хүчил агуулагддаг. Мөн бактер, мөөгөнцөр устгах үйлчилгээтэй "аллицин" гэх органик нэгдэл бас байдаг. Гэхдээ дээрх бодисуудын үр нөлөөг хангалттай гаргахын тулд таны идэж буй сармис шинэхэн байх нь маш чухал.

Сармис нь судас өргөсгөж, даралт бууруулах үйлчилгээтэй. Даралтыг хэвийн хэмжээнд нь байлгая гэвэл өдөрт 4 хумс сармис идэх хэрэгтэйг эрдэмтэд зөвлөж байна. Мөн сармис нь бие дэх хортой холестеролын хэмжээг 10-15 хувь бууруулдаг. Ингэснээр зүрхний өвчтэй болох, зүрхний шигдээс үүсэх эрсдэл 50 хувиар буурдаг байна.

Хүчилтөрөгчийн исэлдэх процессын улмаас хүний тархи болон бие хөгширч байдаг. Бид хоол хүнс, хүчилтөрөгчийг шингээж "шатаадаг" ч тэднийг энерги болгон боловсруулдаггүй. Цаг хугацаа өнгөрөх тусам уг процесс нь биеийн эсүүдийг үхүүлж, улмаар арьс сулран өнгөө алдаж, оюун санаа ч мууддаг байна.

Сармис нь тархины насжилтыг удаашруулах үйлчилгээтэй олон бодис, нэгдлийг агуулдаг байна. Ахмад настангууд альцхаймерийн буюу зөнөх өвчнөөс сэргийлэхийн тулд, залуус ой санамжаа сайжруулж, тархины ажиллагаагаа сэргээхийн тулд сармисыг хэрэглэх нь маш үр дүнтэй ажээ.

Д.ТУЯА