Нэмэлт: 18.50 цагт

БНСУ-д шинэ коронавирус /Covid 19/-ийн халдвар хурдацтай тархаж байгаа учраас Ерөнхийлөгч Мүн Жэ Ин өнөөдөр /2020.02.23/ улс орон даяар өндөржүүлсэн бэлэн байдал зарлалаа.

Өнөөдрийн 17:00 цагийн байдлаар Сөүл болон бусад 17 хот, аймагт халдвар авсан өвчтөний тоо 600 давж, тав дахь иргэн (58 настай, эмэгтэй) коронавирусын халдварын эсрэг эмчилгээ хийлгэж байхдаа амиа алджээ.

Covid19: БНСУ-д нэмж 46 иргэн халдвар авчээ

БНСУ-д  шинэ коронавирус/Covid 19/-ийн халдвар авсан хүмүүсийн тоо өнөөдөр 16.00 цагийн байдлаар 46 хүнээр нэмэгдэж, 602 болсныг Korea Times мэдээллээ.  Өнөөдөр өглөөний байдлаар дээрх өвчний халдвар авсан хүний тоо 556 болоод байсан юм. Өмнөд Солонгосын засгийн газраас Баасан гаригт Тэгү хотыг “онцгой бүс” хэмээн зарлаж, хөл хорио тогтоосон ч халдвар авагсдын тоо хурдацтайгаар нэмэгдсэн төдийгүй нас барсан хүний тоо дөрөв болоод буй.

Израйль БНСУ-аас ирсэн зорчигчдыг хүлээн авсангүй, буцаав

Нэмэлт.14.00 цагт

Израйлийн засгийн газар өчигдөр /2020.02.22/ Өмнөд Солонгос улсаас агаарын хөлгөөр ирсэн 200 гадаад зорчигчдыг хил нэвтрүүлэхээс татгалзаж, Сөүл рүү буцаажээ. Гэхдээ тус нислэгээр ирсэн Израйлийн 12 иргэнийг авч үлдэн, карантинд оруулсан байна. Тус улс өчигдөр Япон, Өмнөд Солонгосын бүх нислэгээ цуцалжээ.

Хубэй мужид өнгөрсөн шөнө 96 хүн нас баржээ 

Нэмэлт: 11.13 цагт 

Хятад дахь халдварын голомт Хубэй мужид Бямба гаригаас Ням гаригт шилжих covid-19 өвчнөөр 96 хүн нас барснаар нийтдээ 2400 хүний амь хохирлоо. Түүнчлэн Хубэй мужид  халдварын тоо 630-р нэмэгдэж, Хятад даяар халдварын тоо 77,000 хүрчээ. Одоогоор нийт халдвар авсан хүмүүсийн хоёр хувь нь нас бараад байна.

ИЗРАЙЛИЙН АЛБАНЫХАН ӨМНӨД СОЛОНГОС, ЯПОНООС ИРСЭН ХҮМҮҮСИЙГ ХӨЛ ХОРИНО

Израйлийн засгийн газраас Өмнөд Солонгос, Япон улсаас эргэн ирсэн хүмүүсийг бүгдийг нь хоёр долоо хоногийн хөл хорионд оруулж байна. Өмнө нь Хятад, Тайланд, Сингапур, Хонгконг, Макаогаас ирсэн иргэдийг л хөл хорьж байсан ч тус хоёр улсад халдварын тоо огцом нэмэгдсэн юм. Түүнчлэн Эрүүл мэндийн сайдын мэдээлснээр хоёрдугаар сарын эхээр Израйль, Баруун эрэгт аялсан Өмнөд Солонгосын есөн иргэн коронавирусийн халдвар авсан нь тогтоогдсон аж. Палестины Дотоод хэргийн сайд Израйльтай ижил арга хэмжээг авч байна. Мөн Иранд халдвар илэрснээс хойш зургаан хүн уг өвчнөөр нас баржээ. Иракийн Арак хотод зүрхний өвчинтэй хүн нас барсан ба түүнээс  коронавирусийн халдвар илэрчээ. Тус улсад одоогийн байдлаар халдварын 28 тохиолдол илрээд байна. Ираны Засгийн газраас халдварыг зогсоохын тулд бүх кинотеатр, урлаг соёлын үзвэрийг долоо хоногийн хугацаагаар хоригложээ.

АНУ ИРГЭДЭЭ ӨМНӨД СОЛОНГОС РУУ АЯЛАХГҮЙ БАЙХЫГ АНХААРУУЛАВ

Өмнөд Солонгост халдварын тоо хоногт хоёр дахин нэмэгдэж байгаа тул АНУ-ын Засгийн газраас иргэдээ тус улсад аялахгүй байхыг анхааруулжээ. Мөн тус улсын өвчтэй байж болзошгүй иргэдтэй харилцах, гар барихаас зайлсхийж, гараа тогтмол савандаж угаахыг сануулсан байна. Суурь өвчтэй, биеийн байдал нь сул хүмүүс аль болох Өмнөд Солонгос руу аялахгүй байх, шаардлагатай нөхцөлд эмчтэйгээ зөвлөхийг анхааруулжээ.

COVID-19: Италид 76, Өмнөд Солонгост 556 хүн халдварлав

Итали улсад шинэ коронавирус  буюу /covid-19/ өвчнөөр хоёр хүн нас барж, 76 хүн халдварлажээ. Италийн эрх баригчдын зүгээс  халдвар гарсан хойд хэсгийн Ломбарди болон Венето мужуудад хөл хорио тогтоож, тархалтыг хязгаарлах хяналтаа чангасан байна. Итали хойд хэсэгт өнгөрсөн Баасан гаригт 78 настай эрэгтэй, Пүрэв гаригт Милан хотоос 50 км зайтай орших хотод 76 настай эмэгтэй коронавирусийн халдвараар нас баржээ.  Италийн Венето мужид 17 хүн халдвар авсан нь тогтоогдсон ба карнивал багт наадмыг цуцлахаар хэлэлцэж байна. Түүнчлэн хөрш зэргэлдээ Ломбарди мужид халдварын 54 тохиолдол бүртгэгджээ. Халдварын голомтоос 50 км зайтай орших Милан хотод эмэгтэйчүүдийн хувцас загварын долоо хоног үргэлжилж байна. Халдварын эх үүсвэр нь Миланы зүүн өмнөд хэсгийн 50 орчим оршин суугчтай Кодогно гэх жижиг хотоос эхлэлтэй гэж сэжиглэж, хүмүүсийг гадуур гарахгүй, олноороо цугларахгүй байхыг анхааруулжээ.

Миланд хөл хорионы улмаас сургууль, их сургуулиуд хаагдаж, хөлбөмбөгийн тоглолтууд цуцлагджээ.

ӨМНӨД СОЛОНГОСТ ӨНГӨРСӨН ШӨНӨ ХАЛДВАРЫН ТОО 123-ААР НЭМЭГДЭВ

Өмнөд Солонгост коронавирусийн халдвар авсан хүмүүсийн тоо хоёр дахин нэмэгдэж, Ням гаригийн өглөө гэхэд 556 боллоо. Түүнчлэн халдвараар дөрвөн хүн нас барсныг Өмнөд Солонгосын Халдварт өвчинтэй тэмцэх төвөөс мэдээлжээ. Халдварын олонх нь Тэгү хотын эргэн тойрны мужуудад байна. Өмнөд Солонгосын засгийн газраас Баасан гаригт Тэгү хотыг “онцгой бүс” хэмээн зарлаж, хөл хорио тогтоожээ.

Шинээр халдвар авсан 123 хүний 75 нь Тэгү хот дахь халдварын голомт болсон Шинчёнжи сүмийн үйл ажиллагаатай холбоотой аж. Өмнөд Солонгосын албаныхан Шинчёнжи сүмийн 9000 гаруй гишүүнийг өөрсдийгөө карантинд оруулж, бусдаас тусгаарлахыг шаардаж байна. Хятадын Ухань хотоос нэгдүгээр сарын 20-нд Өмнөд Солонгост эргэн ирсэн эмэгтэйгээс анх халдвар тархсан юм. Харин Тэгү хотын сүмд халдвар тараасан эмэгтэй нь 31 дэх өвчтөн байсан ба тэрээр олон хотоор тэнэж, одоогийн нөхцөл байдлыг үүсгэснээр "супер халдвар тараагч" гэгдэж байна.

Үүний зэрэгцээ халдвар авсан 18 хүн эдгэрч эмнэлгээс гарчээ. Ням гаригийн өглөө гэхэд нийт 6039 хүнийг карантинд оруулж, шинжилгээ авсан ба орон даяар нийтдээ 22633 хүнээс шинжилгээ авсны 16038 нь сөрөг гарсан аж.

Мөн Өмнөд Солонгосын зүүн өмнөд хэсгийн Гүми хот дахь Самсунг брэндийн үйлдвэрт нэг халдвар илэрснээр үйл ажиллагааг нь Даваа гариг хүртэл зогсоолоо.

Эх сурвалж: RT, Yonhap