Шударга өрсөлдөөн, хэрэглэгчийн төлөө газраас зургаан дүүрэгт байрлах есөн  эмийн сан, нэг эм ханган нийлүүлэх бөөний төвд хяналт шалгалт хийжээ. Шалгалтад хамрагдсан  есөн эмийн сангаас хоёр эмийн сан нэг удаагийн амны хаалтыг 1100 -1200 төгрөгөөр худалдан борлуулж байсан бол гурван  эмийн санд амны хаалтны нөөц байхгүй, дууссан, бусад эмийн сангийн хувьд даавуун амны хаалт болон Япон, БНСУ-д үйлдвэрлэсэн шүүлтүүтэй амны хаалтыг худалдаалж байсан аж. 

Хяналт шалгалтаар амны хаалтны нийлүүлэлтийг зохиомлоор багасгаж хомсдол үүсгэсэн нөхцөл байдал тогтоогдоогүй. Харин нөөц дууссан учраас олон нийтийн сүлжээгээр болон хувь хүмүүсээс амны хаалт худалдан авч байна гэсэн тайлбарыг эмийн сангуудаас өгчээ.

Тайлбар, мэдээллийн дагуу шалган үзэхэд хувь хүмүүс олон нийтийн цахим хуудас, фейсбүүк групп, фейсбүүк хуудас ашиглан нэг удаагийн амны хаалтыг 1000-1500 төгрөг, N-95 амны хаалтыг 3000-4000 төгрөгөөр бөөнөөр эмийн сангуудад борлуулж байгаа нь амны хаалтны үнийг зохиомлоор өсгөх нөхцөлийг бий болгож байгаа нь тогтоогдсон байна. Иймд амны хаалтны үнийн хөөргөдөл үүсгэж буй иргэдийг олж тогтоож, холбогдох арга хэмжээг авахаар Цагдаагийн ерөнхий газартай хамтран ажиллаж байгаа аж.

Э.БУРАМ