Сар шинийн өдрүүдэд ерөнхий эргүүл, хариуцлагатай жижүүр ажиллана

Сар шинийн өдрүүдэд Хан-Уул дүүргийн Засаг даргын Тамгын газарт ерөнхий эргүүл, хариуцлагатай жижүүр ажиллуулах тухай Засаг даргын захирамж гарлаа. Захирамжийн дагуу томилогдсон ерөнхий эргүүл, хариуцлагатай жижүүрүүд /2020.02.21/-ний өдрийн 18:00 цагаас /2020.02.27/-ны өдрийн 09:00 цаг хүртэл бэлэн байдалд ажиллаж, шуурхай мэдээллийг хүлээн авна.

Дээрх өдрүүдэд шуурхай мэдээллийг Хан-Уул дүүргийн Засаг даргын Тамгын газрын 7777-1965, Шуурхай штабын 83120466 дугаарын утсанд болон нийслэлийн Шуурхай удирдлага, зохицуулалтын төвийн 310005 дугаарын утсанд холбогдож өгөх боломжтой.

Мөн дүүргийн Онцгой комиссын шийдвэрээр батлагдсан хуваарийн дагуу нутаг дэвсгэрийн хэмжээнд нийслэлийн агентлаг, газруудын болон дүүргийн нийт 700 гаруй албан хаагч ажиллаж байна.

Эргүүлээр ажиллах албан хаагчид нь бүсчилсэн хуваарийн дагуу хотын гудамж талбайд, нийтийн эзэмшлийн болон үйлчилгээний газрууд, орон сууцны орчны газарт нус, цэр, шүлсээ хаяхгүй байх, иргэд, олон нийтэд амны хаалтыг зөв хэрэглэх талаар анхааруулга, зөвлөмж өгч байна.

Түүнчлэн цаг агаарын нөхцөл байдалтай холбоотойгоор байгууллага, аж ахуйн нэгжүүдэд цас болон орчны 50 м газраа цэвэрлэх үүрэг даалгаврыг давхар өгч байна.

Өөрийгөө болон гэр бүлээ хамгаалан, бусдыг хүндэтгэн амны хаалтаа хэрэглэж байгаа иргэд, эргүүлүүдийн тавьсан шаардлагыг эерэгээр хүлээн авч буй байгууллага, аж ахуйн нэгжүүддээ талархал илэрхийлье!

“Эргүүл” арга хэмжээ өнөөдрөөс эхлэн гуравдугаар сарын 01-ний өдрийг хүртэл үргэлжлэх юм.