Сөүлийн Дээд шүүх БНСУ-ын Ерөнхийлөгч асан Ли Мён Багийг /2008-2013 он/ мөнгө завшсан, их хэмжээний авлига авсан хэрэгт буруутайг тогтоож, түүнд 17 жил хорих ял оноосон талаар “Yonhap” агентлагийн мэдээлжээ. Өдгөө 78 настай Ли Мён Баг нийтдээ 15.7 сая орчим ам.долларын торгууль төлөх аж. Түүнийг шүүхийн танхимд баривчилжээ.

Өмнөд Солонгосын Прокурорын газраас Ли Мён Багийг хамгийн том хувьцаа эзэмшигч нь болох автомашины сэлбэг хэрэгсэл үйлдвэрлэгч DAS компанийн хөрөнгийг завшсан, мөн Ерөнхийлөгч байх хугацаанд “Samsung Electronics” компаниас хахууль авсан гэж сэжиглэн шалгаж эхэлжээ.

Ли Мён Баг өмнө нь авлига, хээл хахуулийн хэргээр ял эдэлж байсан аж. Түүнийг 2018 оны гуравдугаар сарын 22-ны өдөр баривчилж, мөн оны 10 дугаар сарын 5-нд Сөүлийн дээд шүүх түүнд 15 жил хорих ял оноосон боловч 2019 оны гуравдугаар сард эрүүл мэндийн байдал муудсан шалтгаанаар батлан даалтаар суллагджээ.

Эх сурвалж: TASS
Б.ЖАРГАЛ