“Peugeot Citroen” Европын гаднах зах зээлээ тэлэхээр төлөвлөж байна. Францын автомашин үйлдвэрлэгч тус компани энэ оны эхний хагас жилд буцаж ашигтай ажиллаж эхэлсэн бөгөөд үүнд шинэ загварууд нь Хятадад эрэлт сайтай байсан явдал нөлөөлжээ гэж “BBC” агентлаг мэдээлж байна. Нэгдүгээр сараас зургаадугаар сарын сүүл хүртэлх зургаан сарын дотор тус компани 680 сая еврогийн (885 сая ам.доллар) ашигтай ажилласан бөгөөд орлого нь 21 хувиар нэмэгджээ. 2015 он гэхэд тус компани нийт борлуулсан автомашиныхаа талаас илүү хувийг Европоос гаднах зах зээл дээр зарсан байхаар төлөвлөж байна. “Оны эхний хагаст ашигтай ажилласнаар манай групп ашигтай ажиллах зөв зам дээрээ гарлаа” гэж тус компанийн дарга Филипп Варин ярьж байна.

Ноён Варин тавдугаар сард Хятадын “Changan Automotive”-тай байгуулсан гэрээгээ онцлон дурдсан. 50-50 хувийн хөрөнгө оруулалттай байгуулж байгаа хамтын үйлдвэр нь Хятадын өмнөд хэсэгт байгаа Шенжен хотод байгуулагдаж байгаа бөгөөд 2012 оны хоёрдугаар хагасаас эхлэн үйлдвэрлэлээ эхлэх ба жилд 200,000 автомашин үйлдвэрлэх хүчин чадалтай байх болно.

Уг гэрээг “Peugeot Citroen” Европоос өөр бүсэд борлуулалтаа нэмэгдүүлэх стратегийнхаа хүрээнд байгуулсан байна. “Citroen” үүнээс гадна Хятадын “Dongfeng Motor Group” компанитай хамтын үйлдвэр байгуулан ажиллаж байгаа бөгөөд тус үйлдвэрийн борлуулалт энэ оны эхний хагаст 50 хувиар нэмэгдсэн байна. Европ болон АНУ-д дэлхийн эдийн засгийн хямралтай холбоотойгоор эрэлт хүчтэй унасан энэ үед дэлхийн автомашин үйлдвэрлэгчид Хятадыг эрэлтээ нэмэгдүүлэх чухал зах зээл гэж үзэж байна.

Т.Бадрах