Осло дахь ОХУ-ын ЭСЯ мэдэгдэл гаргаж Норвег улс Шпицбергенийн гэрээгээр хүлээсэн үүргээ зөрчлөө гэжээ. Уг мэдэгдлийг ЭСЯ-ны Facebook дэх хуудсандаа нийтэлсэн байна.

"Шпицбергенд олон асуудал хуримтлагдаад байна. Бидний хүсэлтийг үл харгалзаж байгаа учраас манай Гадаад хэргийн сайд Сергей Лавров Норвегийн Гадаад хэргийн сайд Ина Эриксенд захидал явуулах хэрэгтэй болсон” хэмээн уг мэдэгдэлд дурджээ.

Энэхүү бүлэг арлыг эзэмших Норвегийн эрхийг огт хөндөөгүй ч Шпицберген нь Норвегийн унаган нутаг биш, 1920 оны гэрээгээр эдгээр бүлэг арал Норвегийн бүрэн эрхэд хамаарч байгаа, гэхдээ бүлэг аралд хамаарахгүй хэсэгт Норвег хяналтаа тогтоож, энэ хэсэгт хийх нефть, байгалийн хийн лицензийн хуваарилалтад нөлөөлж байна хэмээн мэдэгдэлд дурдсан байна.

Норвегийн энэ байдлаас шалтгаалан Оросын компаниуд нөөц ихтэй газруудад хайгуул хийх хүсэлтээ өгч чадахгүйд хүрээд байгаа ажээ. Тиймээс энэ асуудлыг шийдэхийг Норвегийн талаас оросууд хүсч байгаа юм.

Шпицбергений бүлэг арал нь Хойд мөсөн далайн 76-гаас 80 дугаар параллелийн хооронд байрладаг олон улсын онцгой эрхтэй бүс юм.

1920 оны гэрээгээр бүлэг арал Норвегийн бүрэн эрхэд хамаарах болсон юм. Гэхдээ уг гэрээнд оролцогч талууд, тухайлбал, ОХУ энд байгалийн баялаг ашиглах, эрэг хавийн усыг ашиглах эрхтэй юм.

Эх сурвалж: РИА НОВОСТИ