СЭРЭМЖЛҮҮЛЭГ: БАГА НАСНЫ ХҮҮХЭД РЕЗИНЕН ЧИХЭРТ ХАХАЖ НАС БАРЖЭЭ

Архангай аймгийн Өлзийт суманд хоёрдугаар сарын 7-ны өдрийн 07.30 цагт гэртээ чихэр идэж байсан ой найман сартай хүүхэд хахаж нас барсан хэрэг гарсан байна. Хэргийн газарт хуулийн байгууллагынхан очиж шалгахад, ой найман сартай Э нь гаднаа харагдах ил гэмтэл шархгүйгээр нас барсан байжээ.

Урьдчилсан байдлаар, гэртээ байсан хүүхэд резинен чихэр идэж байгаад хоолойд нь тээглэж, улмаар хахаж нас барсан гэх дүгнэлтэд хүрсэн байна. Уг хэргийг Архангай аймгийн Цагдаагийн хэлтэс үргэлжлүүлэн шалгаж буй. Иймд эцэг эх, асран хамгаалагч та бүхнийг бага насны хүүхдийг байнгын хараа хяналтад байлгах, хүүхдэд аюул учруулж болохуйц ахуйн хэрэглэл, хүнсний бүтээгдэхүүн хэрэглэхгүй байхыг анхааруулж байна. 

СОГТУУ ЖОЛООЧИЙН УЛМААС 4-46 НАСНЫ ГУРВАН ХҮН БЭРТЖЭЭ

Тээврийн цагдаагийн албаны /ТЦА/  Жижүүрийн шуурхай удирдлагын хэлтэст өнгөрсөн амралтын өдрүүдэд нийт 312 дуудлага мэдээлэл хүлээн авснаас 270-н  зам тээврийн ослын шинжтэй дуудлага мэдээлэл бүртгэгдсэн байна.  Бүртгэгдсэн зам тээврийн ослын улмаас 12 хүн гэмтэж бэртсэнээс  хоёр нь бага насны хүүхэд байжээ.

Нийт хүн бэртсэн ослыг хэлбэрээр нь авч үзвэл

• Мөргөлдөх хэлбэрээр-3
• Явган зорчигч мөргөх хэлбэрээр-2
• Үл хөдлөх зүйл мөргөх хэлбэрээр – 1 тус хөдөлгөөнд оролцсон байна.

Ноцтой зам тээврийн ослоос дурдвал,

Өнгөрсөн бямба гаригт 19.43 цагийн орчимд Сонгинохайрхан дүүргийн наймдугаар хороо Баянхошууны спорт сургалтын төвийн урд замд Toyota prius маркийн автомашины жолооч Т нь архи согтууруулах ундааны зүйл хэрэглэсэн үедээ тээврийн хэрэгсэл жолоодож Toyota prius, Toyota Kluger маркийн автомашинуудтай мөргөлдөж, зорчигч О /20 настай, эмэгтэй/, С /4 настай, эмэгтэй/, Ж /46 настай, эмэгтэй/ нарын  гурван хүн гэмтсэн.

Ням гаригт  00:09 цагийн орчимд Баянзүрх дүүргийн 12 дугаар хороо Жанжин клубийн гудамж Toyota prius маркийн автомашины жолооч О нь архи согтууруулах ундааны зүйл хэрэглэсэн үедээ тээврийн хэрэгсэл жолоодон гэрлийн шон мөргөж хэргийн газрыг орхиж явсныг ТЦА-ны алба хаагчид шуурхай илрүүлсэн.

Э.БУРАМ