Хятадын Ухань хотод анх дэлгэрсэн шинэ төрлийн коронавирусийн халдвараар өвчлөгсдийн тоо өнөөдөр /2020.02.10/-ийн байдлаар 40,000 давж, нас барсан хүний тоо нэг хоногийн дотор 91-ээр нэмэгдэж 904 болж, 2002 онд дэгдсэн SARS-ийн халдвараар нас барагсдын тоог маш богино хугацаанд гүйцээд байна. Харин эдгэсэн хүмүүсийн тоо 3281 болжээ.

ХАЛУУН ТОГООНЫ РЕСТОРАНД ХАМТ ХООЛЛОСОН НЭГ ГЭР БҮЛИЙН ЕСӨН ГИШҮҮН КОРОНАВИРУСИЙН ХАЛДВАР АВЧЭЭ

Хонгконгод өнгөрсөн Ням гариг /2020.02.09/-т халдвар авсан хүний тоо огцом буюу 10-аар нэмэгдэж, нийт халдвар авсан хүний тоо 36 болжээ. Эдгээр 20 хүний ес нь нэгдүгээр сарын 19-ний өдөр “Lento Party Room” гэх халуун тогооны ресторанд хамт хооллосон нэг гэр бүлийн гишүүд байсан аж. 24 настай залуу болон түүний аав, ээж, эмээ, хоёр нагац, гурван үеэл гээд 22-68 насны есөн хүн ийнхүү зэрэг халдвар авсан байна. Тиймээс Хонгконгийн эрх баригчид өөртөө болон бусдад халдвар тараахгүй байхын тулд ард иргэдийг аль болох олноороо цугларахгүй, баяр ёслол тэмдэглэхгүй байхыг уриалжээ.

ЯПОНД ХӨЛ ХОРИОНД ОРСОН 3700 ХҮНТЭЙ ХӨЛГИЙН ЗОРЧИГЧДЫГ ШАЛГАЖ ДУУСАВ

Японы Ёкохама хотын боомтод энэ сарын 4-ний өдөр хөл хорионд орсон 3700 хүнтэй АНУ-ын “Diamond Princess” хөлөг онгоцон дээрх бүх хүнийг шалгаж дуусаад, зорчигчид болон хөлгийн багийн гишүүдийг онгоцноос буулгажээ. Анх тус онгоцоор аялж яваад замдаа буусан 80 настай Хонгконгийн иргэнээс коронавирусийн халдвар илэрснээс үүдэн тус хөлгийг хөл хорионд оруулсан юм. 2600 зорчигч, хөлгийн багийн 1000 гаруй гишүүнтэй аялж явсан “Diamond Princess” онгоцыг хөл хорионд оруулснаас хойш нийт 70 хүн коронавирусийн халдвар авсан нь батлагдсан байна.

Энэхүү хөлөг нь АНУ-ын “Princess Criuses” аяллын компанийн эзэмшлийн хөлөг бөгөөд тус компанийн захирал Ян Сварц бүх аялагчид “Нөхцөл байдлыг бодитоор дүгнэж, тэвчээртэй хандсанд” талархаад тэдний бүх зардлыг нөхөн олгохоор болсноо мэдэгджээ. Бүх зардал гэдэгт онгоцны тийз, аяллын үнэ, зочид буудлын төлбөр, татвар хураамж гэх мэт зорчигчдоос гарсан зарлага бүр багтах аж.

Түүнчлэн зорчигчдын сэтгэл санааны хохирлыг барагдуулахын тулд бүх зорчигчид энэ удаагийнх шиг аяллын хөтөлбөрт дахин 100 хувь үнэгүй хамрагдах эрх олгохоо мэдэгдсэн байна. Гэхдээ энэхүү эрх нь 2021 оны хоёрдугаар сарын 28-ныг хүртэл хүчинтэй байх аж.

КОРОНАВИРУСИЙН ТАЛААР ОР ҮНДЭСЛЭЛГҮЙ ХУДАЛ МЭДЭЭЛЭЛ ТАРААХ НЬ ЖИНХЭНЭ ВИРУСЭЭС Ч АЮУЛТАЙ

Коронавирусийн халдвар хурдацтай нэмэгдэж байгаатай холбогдуулан АНУ-д суугаа Хятадын Элчин сайд Цуй Тянькай үймээн самуунаас зайлсхийх, вирусийн гарал үүслийн талаар ор үндэслэлгүй худал цуу яриа тараахгүй байхыг анхааруулжээ.

Тэрбээр энэ тухай “Дэлхийн бүхий л чадварлаг эрдэмтэд энэ вирусийн талаар өдөр, шөнөгүй судлаад ч гарал үүслийг нь яг таг тодорхойлж чадаагүй байхад ямар ч шинжлэх ухааны болон албан ёсны үндэслэлгүй мэдээ мэдээлэл тарааж, түүндээ итгэнэ гэдэг бол “солиотой” хэрэг. Энэ бүх худал мэдээлэл, цуурхал эцэстээ үймээн самуун бий болгоно. Наад зах нь л гэхэд ялгаварлан гадуурхах явдал газар авч байна шүү дээ. Худал цуурхал нь вирустэй тэмцэх олон улсын хамтарсан хүчин чармайлтад маш их хор хөнөөлтэй. Сүүлийн үед нэг “байж боломгүй” цуурхал тараад байгаа нь энэ вирусийг АНУ-ын цэргийн лабораторид бүтээж, Хятадад зориудаар тараасан биологийн зэвсэг гэх цуурхал. Энэ мэт хэт улстөржсөн, худал мэдээлэлд бид хэдий болтол итгэх ёстой вэ?” гэж хэлжээ.

Түүнчлэн ДЭМБ-ын дарга Тедрос Адханом ч мөн янз бүрийн худал мэдээлэл, төөрөгдүүлэлт нь үхлийн вирустэй өдөр шөнөгүй тэмцэж буй хүмүүсийн хичээл зүтгэлийг талаар болгож буйг сануулсан байна. “Буруу ташаа мэдээлэл нь жинхэнэ халдвараас ч илүү аюултай байдалд хүргэж болзошгүй юм” гэж тэрбээр онцолжээ.

Оросын зарим хэвлэлүүдээр цацагдаж буй коронавирусийн цаана АНУ-ын Ерөнхийлөгч Дональд Трамп, эсвэл АНУ-ын ямар нэгэн эмийн компани байгаа, коронавирусээр халдварласан хүмүүсийн тоог Хятад нуун дарагдуулж байна гэх зэрэг үндэслэлгүй мэдээллүүд ихээхэн тархаж, хүмүүсийг айдас түгшүүрт автуулаад байгаа юм. Үүнээс гадна Хятад эмэгтэйн сарьсан багваахайн шөл ууж буй видео бичлэг зэрэг цахим орчинд тарж буй худал мэдээллүүд ч их байгаа. Энэхүү бичлэг нь 2016 онд хийгдсэн бөгөөд Хятадад ч биш Номхон далайн баруун хэсэгт байрлах Палауд хийгдсэн бичлэг аж.

Тедрос Адханом “Би бас айдас биш баримт биш, ач холбогдлын талаар товчхон яримаар байна. Худал ташаа мэдээллүүд нь төөрөгдөл үүсгэж, олон нийтэд айдас төрүүлдэг. ДЭМБ-ын хувьд энэ нөхцөлд зөвхөн вирусийн тархалттай тэмцэхээс гадна өвчний талаар ташаа мэдээлэл тарааж буй троллуудтай давхар тэмцэх шаардлага үүсч байна” хэмээн хэлжээ.