"Гуравдугаар сарын 2 хүртэл монгол иргэдийг БНХАУ руу зорчихыг хориглолоо"

НЭМЭЛТ: 14.54 ЦАГ

Засгийн газрын хуралдаанаар Монгол Улстай хиллэдэг БНХАУ-ын бүх боомтоор /агаарын, төмөр замын, автозамын/ Хятад иргэд болон Хятад улсаар дамжин ирж буй гадаад улсын иргэдийг нэвтрүүлэхгүй. Мөн гуравдугаар сарын 2 хүртэл Монгол Улсын иргэд урд хөрш рүү явахыг хориглох шийдвэр гаргалаа.

Урд хөрштэй хиллэдэг бүх боомтоор Монгол иргэдээ хоёрдугаар сарын 6 хүртэл нэвтрүүлнэ.
Гуравдугаар сарын 2 хүртэл Буянт-Ухаа болон Замын-Үүдийн боомтуудаар буцаж ирж буй Монгол иргэдээ нэвтрүүлнэ.
Бараа таваарын импорт, экспортыг хязгаарлахгүй.

ХИЛЭЭР ЗОРЧИХЫГ ХОРИГЛОСОН Ч БАРАА, БҮТЭЭГДЭХҮҮНИЙ ЭКСПОРТ, ИМПОРТЫГ ХЯЗГААРЛАХГҮЙ

Засгийн газрын ээлжит бус хуралдаан болж хилийн боомтод хязгаарлалт хийх талаар хэлэлцэн шийдвэр гаргалаа. Энэ дагуу БНХАУ-тай хиллэдэг агаар, төмөр зам, автозамын бүх боомтоор БНХАУ-ын иргэд болон тус улсын нутаг дэвсгэрээр дамжин ирэх бусад улсын иргэдийг 2020 оны хоёрдугаар сарын 1-ний өдрөөс 2020 оны гуравдугаар сарын 2-н хүртэл хугацаанд хилээр нэвтрүүлэхийг хориглов. Мөн хугацаанд Монгол Улсын иргэд БНХАУ-д зорчихыг хориглолоо. Гэхдээ ажлын зайлшгүй шаардлагаар явах бол Улсын онцгой комиссын даргын зөвшөөрлийг үндэслэн хилээр гаргах юм. БНХАУ-аас ирэх, мөн тус улсаар дамжин ирж байгаа Монгол Улсын иргэдийг 2020 оны хоёрдугаар сарын 6-н хүртэл бүх боомтоор хил нэвтрүүлнэ. Үүнээс хойш 2020 оны гуравдугаар сарын 2 хүртэл монгол иргэдийг зөвхөн Буянт-Ухаа болон Замын-Үүд боомтоор оруулна.

Хилийн Даян-Хуньшанзюй, Байтаг-Улиастай, Бургастай-Лаоемяо, Сүмбэр-Рашаан, Хавирга-Архашаат автозамын боомтуудыг түр хаалаа. Булган-Такашикэ, Шивээхүрэн-Сэхээ, Гашуунсухайт-Ганцмод, Ханги-Мандал, Замын-Үүд-Эрээн, Бичигт-Зүүнхатавч, Баянхошуу-Өвдөг боомтоор хил нэвтэрч байгаа ачаа тээврийн хэрэгсэл, жолооч нарт энэ дэглэм хамаарахгүй. Замын-Үүд-Эрээн чиглэлд ачаа тээврийн галт тэрэг хуваарийн дагуу зорчих бөгөөд зүтгүүрийн бие бүрэлдэхүүн, агаарын хөлгийн багийн гишүүдэд хорио цээр мөн хамаарахгүй юм байна. Хорио цээрийн хугацаанд бараа таваарын импорт, экспортыг хязгаарлахгүй. Түүнчлэн шинэ коронавирусын өвчинтэй тэмцэхэд нь зориулж БНХАУ-д 200 мянган ам.доллартай тэнцэх хэмжээний мөнгөн тусламж үзүүлэхээр болов

Сануулахад, Засгийн газрын хуралдааны өмнө ҮАБЗ-ийн хуралдаанаас зөвлөмж гаргасны дагуу Засгийн газар хуралдаж, ийнхүү шийдвэрлэжээ.

НЭМЭЛТ: 14.00 ЦАГ

ҮАБЗ-ийн хуралдаан дуусч, Засгийн газар яг одоо ээлжит бусаар хуралдаж байна. Засгийн газрын хуралдаанаар ДЭМБ-аас өгсөн зөвлөмжийн дагуу үүсээд байгаа нөхцөл байдалтай холбогдуулан ямар арга хэмжээ авах талаар хэлэлцэх гэж байна. Энэ талаар ЗГХЭГ-ын дарга Л.Оюун-Эрдэнэ “Хилийг хэсэгчлэн зохион байгуулалттай, өндөржүүлсэн бэлэн байдлаар тодорхой хэмжээгээр хязгаарлах шаардлага гарч байна. Ингэхдээ иргэдийн зорчих, орох, гарах эсэхийг хязгаарлах асуудлыг хэлэлцэнэ. Харин хүнсний импорт тасрахгүй. Мөн БНХАУ-ын Ухань хотод байгаа оюутнуудаа маргааш авчрахаар болсон бөгөөд ХӨСҮТ-д хэсэг хугацаанд хяналт тавихаар бэлтгэл ажлаа базаасан. Засгийн газрын зүгээс нэг сувгаар бодит мэдээллийг өгөх бөгөөд үүнийг хэвлэл мэдээллийнхэн бас хамтарч ажиллаасай гэж хүсч байна" гэлээ.

ҮАБЗ, ЗГ ЦАГ ҮЕИЙН АСУУДЛААР ХУРАЛДАНА

Үндэсний аюулгүй байдлын зөвлөл /ҮАБЗ/ өнөөдөр /2020.01.31/ 12.00 цагт цаг үеийн үүсээд байгаа нөхцөл байдлын талаар хуралдахаар товложээ. Монгол Улсын Ерөнхийлөгчийн хувьд Давосын Эдийн засгийн чуулганд оролцоод, Норвеги улсад айлчаад өнөөдөр эх орондоо ирж байгаа юм.
БНХАУ-ын коронавирусийн тархалт өндөр байгаа, ДЭМБ-ээс дэлхийн хэмжээнд онц байдал зарлах шийдвэр гаргаад байгаа бөгөөд Монгол Улсад одоогоор коронавирусийн тохиолдол бүртгэгдээгүй байгаа ч сургууль, цэцэрлэг, их, дээд сургуулийг түр хугацаагаар хаах, олон нийтийн арга хэмжээг зохион байгуулахыг хориглох зэрэг шийдвэрүүдийг гаргаад байгаа юм.
Мөн Засгийн газар ээлжит бусаар цаг үеийн нөхцөл байдлаар хуралдах юм байна.
Ш.ОЧ