Шинэ коронавирусийн талаарх мэдээлэлтэй холбогдуулан иргэдийн дунд томоохон зах, худалдааны төвүүдийн үйл ажиллагааг хааж, хүнсний хомсдол үүсэх нь гэсэн цуурхал, болгоомжлол үүсч, гурил, будаа, талх, нарийн боов зэргийг нөөцлөхөөр их хэмжээгээр худалдан авч, дэлгүүрийн лангууг хоосолж, зохиомол үнийн хөөрөгдөл үүсгэж байна.

Өнөөдөр хүн амыг эрүүл, чанартай хүнсээр 84 жилийн турш хангаж ирсэн Монгол Улсын хүнсний манлай ууган үйлдвэр “Өгөөж-Чихэр боов” ХХК түүхий эд материалын хангалттай нөөцтэй байгаа бөгөөд үйлдвэрлэлээ хэвийн явуулж байгаагаа албан ёсоор мэдэгдлээ. Тус компани бүтээгдэхүүний үнийн хувьд тогтвортой барих бодлого хэрэгжүүлээд зогсохгүй, харин ч цагаан сарын бэлгийн бүтээгдэхүүнүүд, “Угалз” хэвийн боов болон гол нэрийн зарим бүтээгдэхүүн дээрээ хоёрдугаар сарын 6-ныг дуустал хямдрал, урамшуулалтай хөтөлбөр хэрэгжүүлж байгаагаа дуулгалаа. Худалдан авагч нартаа хандан талх, нарийн боовыг яаран сандран их хэмжээгээр нөөцлөх шаардлагагүй харин ч буруу нөхцөлд хадгалснаар хүнсний бүтээгдэхүүний чанар, аюулгүй байдал алдагдах эрсдэлтэй гэдгийг сэрэмжлүүлэв.