БНСУ-ын Халдварт өвчин судлалын төвийн энэ сарын 26-ны 11.00 цагийн байдлаар гаргасан мэдээгээр тус улсад шинэ короновирусийн халдварын гуравдах тохиолдол илэрсэн болохыг албан ёсоор мэдэгдлээ. БНСУ-ын иргэн /55 настай, эрэгтэй/ БНХАУ-ын Үхань хотод оршин суудаг байсан бөгөөд энэ сарын 20-ны өдөр нутаг буцаж иржээ. Тэрбээр 22-ны өдрөөс эхлэн өндөр халуурч эхэлж, 25-ны өдөр Халдварт өвчин судлалын төвийн шуурхай мэдээллийн 1339 утсанд биеийн байдлын талаар мэдээлэл өгсөн юм байна. Түүнийг БНСУ-ын Гёнги мужийн Мёнжи их сургуулийн эмнэлэгт тусгаарлаж, анхан шатны үзлэгээр шинэ коронавирусийн халдвар болохыг тогтоожээ. Одоогийн байдлаар БНХАУ-аас БНСУ-д ирсэн өндөр халуунтай, ханиалгах, амьсгалын замын өвчний шинж тэмдэг илэрсэн 48 иргэнийг эмнэлгийн хяналтад байлгаж байгаагаас 47 иргэний шинэ коронавирусийн шинжилгээ сөрөг гарч, 1 иргэний шинжилгээний хариу хүлээгдэж байгаа аж.

БНСУ-руу монголчууд олноороо зорчдог, мөн тус улсад 40 мянга гаруй Монгол иргэн оршин суудаг гэх мэдээлэл бий. Тиймээс тус улсад амьдарч байгаа монголчууд уг өвчний халдвараас урьдчилан сэргийлэх бүх л арга хэмжээг авах, мөн дээрх орон руу зорчихгүй байхыг албаныхан анхааруулж эхэллээ.

Л.ОЮУ