УУХҮ-ийн сайд Д.Сумъяабазар Монгол Улсын эдийн засаг, нийгмийг 2020 онд хөгжүүлэх Үндсэн чиглэл, төсвийг хэрэгжүүлэхэд баримтлах бодлого, чиглэлийн талаар Аймаг, Нийслэлийн удирдлагуудад мэдээлэл өгөн засаг дарга нарын асуусан асуултад хариулт өглөө.
Уулзалтын хүрээнд Уул уурхай, хүнд үйлдвэрийн яамнаас 2019 онд хийж гүйцэтгэсэн онцлох ажлууд, түүний үр дүн болон 2020 онд геологи, уул уурхай, газрын тос, хүнд үйлдвэрийн салбарт баримтлах бодлого, авч хэрэгжүүлэх арга хэмжээний талаарх мэдээллийг танилцууллаа.

УУХҮ-ийн сайд Д.Сумъяабазар: “Уул уурхай хүнд үйлдвэрийн салбар нь ирээдүйн 20-30 жилд манай улсын эдийн засгийн тэргүүлэх салбар, хөгжлийн гол хөдөлгүүр нь байна гэдэгт миний бие салбар хариуцсан сайдын хувьд итгэлтэй байдаг. Энэ утгаараа тус салбарт баримталж буй бодлого, хэрэгжүүлж буй төсөл, арга хэмжээний үр дүн нь орон нутгийн байгууллага, иргэдийн харилцан ойлголцол, хамтын ажиллагаанаас шууд хамаарч байгааг онцлон тэмдэглэлээ”.

Мөн уул уурхай хүнд үйлдвэрийн салбарын үр өгөөж тухайн орон нутагт илүү үлдэх учиртай гэдэгтэй салбарын сайд санал нэгтэй байгаагаа уулзалтын үеэр хэлсэн.

Уулзалтын төгсгөлд Засгийн газрын тогтоол, шийдвэрийг орон нутагтаа хэрэгжүүлж, хуулийн дагуу ажиллаж буй аж ахуй нэгжийн үйл ажиллагаанд саад учруулахгүй байх, иргэдийг үнэн, бодит мэдээллээр хангах, зөрчил гаргасан этгээдэд зөвхөн хууль, тогтоомжид заасан хэм хэмжээг баримтлан хариуцлага тооцож ажиллахыг Аймаг, Нийслэлийн удирдлагуудад хүссэн юм.