Жастин Биебер Селена Гомез нар өнгөрсөн бямба гарагт анх удаагаа хамтарсан уран бүтээлээ “OVO Sound Radio”-оор цацсан байна. “Strong” нэртэй шинэ дуу интернет орчинд цацагдах зөвшөөрөлгүй тул хөгжмийн сайтуудад тавигдсан даруйдаа устгагдаж байгаа юм. Энэ дууны утга нь дуучдын үерхдэг байсан хугацаанд болж өнгөрсөн зүйлсээ дүгнэсэн утгатай бөгөөд энэ дуу гарах гэж байсантай холбогдуулан дуучид сүүлийн хэдэн долоо хоногийн туршид хэвлэлд өөрсдийн харилцааны талаар огтхон ч нуулгүй дэлгэн ярьж байжээ. Селена Гомезийн сүүлд гаргасан “Same Old Love” дууг ч мөн Жастинтай эргэн нийлсэнтэй холбоотой дуу гэсэн мэдээлэл гараад байсан ч одоогоор батлагдаагүй байна. “Strong” дуу Жастин Биеберийн арваннэгдүгээр сард худалдаанд гарах “Purpose” цомогт орсон гэх мэдээлэл ч бас байгаа юм.