Украйны онгоцоор зорчиж яваад, пуужинд оногдон амь үрэгдсэн Канад иргэдийн гэр бүлийнхэнд Канадын засгийн газар тус бүр 25000 ам.доллар нөхөн олгохоор болсныг ерөнхий сайд Трюдо мэдэгджээ. Уг онгоц нь нэгдүгээр сарын 8-нд Ираны пуужинд оногдож, хөөрөөд удаагүй байхдаа сүйрсэн юм.

"Оршуулга болон бусад зардалд зориулсан энэхүү тусламж удалгүй зохих хүмүүст очно. Ний нуугүй хэлэхэд бид Ираны засгийн газар энэлж шаналсан иргэдэд маань тусална хэмээн найдаж байна. Гэхдээ би хохирогчдын гэр бүлтэй уулзаад, удаан хүлээж чадахгүйг ойлгосон. Тэдэнд яг одоо л тусламж хэрэгтэй" хэмээн ерөнхий сайд Трюдо ярьжээ.

Осолдсон онгоцонд 176 зорчигч байсны 57 нь Канадын иргэн байсан бөгөөд нь нэг ч хүн амьд гарч чадаагүй юм. Трюдо үргэлжлүүлэн "Иранаас ямар тусламж ирэхийг бид одоохондоо мэдэхгүй байна. Гэхдээ ямар ч тусламж ирлээ гэсэн тэр тусламж засгийн газраар дамжилгүй шууд иргэдэд хүрэх болно" хэмээн ярьжээ.

Мөн Канадын гадаад хэргийн сайд Франсуа Филлип Шампань онгоцны ослын талаар Ираны сайд Мухаммед Жавад Зарифтай Оманд уулзжээ. Уулзалтын үеэр Мухаммед Зариф болсон явдалд гүнээ эмгэнэж буйгаа илэрхийлж, Шампань хохирогчдын гэр бүлтэй уулзсан болон тэд маш их шаналж бас уурлаж байгааг уламжилжээ. Мөн Зариф Канадын гэр бүлүүд болон бусад амь үрэгдэгсдийн эх оронд тусламж илгээх талаар Ираны засгийн газар хэлэлцэж байгаа талаар ярьжээ.

Нас барагсдын цогцос удахгүй эх орондоо хүргэгдэх гэнэ.

Эх сурвалж: cnn.com