“Хаана ч явсан цуг гэж мэдээрэй” хэмээн дуулах нь холгүй, МАНАН дэглэмийн эсрэг тэмцлээ эхлүүлж байсан таваас УИХ-ын гишүүн Л.Болд, Ж.Батзандан нар хаягдсан сурагтай.

Тэднээс Л.Оюун-Эрдэнэ, Т.Аюурсайхан, Х.Нямбаатар нар эрх мэдэлд хүрснээр сайдын сэнтийд сууж, байнгын хорооны дарга болж, томорцгоосон. Харин Л.Болд, Ж.Батзандан нар Шинэ нам байгуулснаас цаашгүй.

Гэтэл ач санах ёстой улсууд нь сүүлийн үед тэднээс жийрхэх болж, УИХ-аас баталсан хууль нь хаягдсан хоёрын ч голыг зорох болсон гэх. Тухайлбал, УИХ-ын сонгуулийг томсгосон 26 тойргоор зохион байгуулахаар болж, хуулийг баталсан нь шинэ нам байгуулаад байгаа Л.Болд, Ж.Батзандан нарт хүндээр тусах болж буй.

Ахмад настны тэтгэврийн зээлийг чөлөөлөх хуулийн төслийг УИХ-аар хэлэлцэх үед хаягдсан хоёрт хань болох хүн гарч ирээгүй гэнэ.

Намынхан нь айлгасан уу, аль эсвэл зангаа гаргасан нь тэр үү. Ахмадуудаа ялгаварлаж болохгүй, тэтгэвэр авч байгаа бүх өндөр настандаа 780 тэрбум төгрөгийг тэгш хуваагаад өгчихье гэж санал гарган, чуулганы танхимын үүдэнд хэвлэлийн хурал хийж, Сүхбаатарын талбайд гарч жагсан, ахмадуудтай уулзаж явахад нөгөө “дайчид”-аас хэн нь ч хамраа цухуйлгаагүй гэсэн шүү.

Сайд Л.Оюун-Эрдэнэ нь гадаадад байж таарсан ч нөгөө хоёр нь хань бараа болж болно оо доо. Улстөрчдийн үерхэл ээ гэж шаазан шиг хэврэг юм даа.

Г.ХОРОЛ