Румын улсын хүндийн өргөлтийн хоёр тамирчин Лондон-2012 зуны ХХХ наадмаас мөнгө болон хүрэл медалиудыг тус тус хүртсэн. Тэгвэл IWF буюу Олон улсын хүндийн өргөлтийн холбооноос Румын улсын тамирчид болох Роксана Кокос болон Разван Мартин нарын 2012 оны шинжилгээний хариуг орчин цагийн технологиор шинжлэн үзэхэд хориотой биохимийн бэлдмэл хэрэглэсэн байсан нь тогтоогдсон тухай ярьжээ. Шинжилгээний дүнд Роксана Кокос нь хоёр өөр төрлийн хориотой биохимийн бэлдмэл хэрэглэсэн нь тогтоогдсон бол Разван Мартинаас гурван төрлийн хориотой биохэмийн бэлдмэл илрүүлжээ.

Разван Мартины хувьд өмнө нь сэргээш хэрэглэсэн нь тогтоогдож 2013-2015 онуудын хооронд эрхээ хасуулж байсан юм.

Роксана Кокос нь Лондон-2012 зуны ХХХ наадмын хүндийн өргөлтийн эмэгтэйчүүдийн -69 кг-ын ангилалд мөнгөн медаль хүртсэн. Харин Разван Мартин нь эрэгтэйчүүдийн -69 кг-ын ангилалд хүрэл медаль хүртсэн байсан билээ.

Эх сурвалж : japantimes.co.jp

Б.МӨНГӨНТАМИР