Хийн халаагуур нүүрс түлэхээс хямд өртөгтэй | News.MN

Хийн халаагуур нүүрс түлэхээс хямд өртөгтэй

Хийн халаагуур нүүрс түлэхээс хямд өртөгтэй

Хийн халаагуур нүүрс түлэхээс хямд өртөгтэй

Монголд ирж буй гадны жуулчид манай гэр хорооллыг хараад их баян улс юм гэж боддог гэнэ. Учир нь айл бүр хашаандаа хаустай, эдлэн газартай, бас унаа машинтай харагддаг. Харин дараа нь хашаандаа дулааны шугам, боловсон нойл, душгүйг мэдээд монголчууд арчаагүй юм гэж боддог биз ээ.

Улсынхаа нийслэлд олноор бөөгнөрсөн монголчууд бид өвөлдөө “утаа үйлдвэрлэгч” болж уушгаа хордуулна. Харин зундаа хөрсөө гэмтээж, агаар бохирдуулна.

Ийм байдлаар бид олон жилийг ардаа үдэж буй. Хөдөө орон нутаг байтугай хотынхоо дунд дэд бүтцээ шийдэж чадаагүй улс. Хот дотроо гэр хороолол гэх “хөдөө нутагтай”-тай. Тэр хөдөө нутгаас өвөлдөө нүүрсний утаа суунаглана. Малгүй л болохоос бараг малчин айлаас ялгаагүй. Гэм нь үйлдвэрлэж буй утаа нь аргалынх бус нүүрснийх. Тиймээс хүний эрүүл мэндэд маш хортой. Улаанбаатрын иргэдийг тэр чигээр нь хордуулж байгаа юм.

Үүнийг шийдэх мэргэн арга Засгийн газар бодож олсон нь сайжруулсан түлш. Гэвч энэ нь тийм ч үр дүнтэй арга биш ажээ. Хэдий энэ жил утаа багассан гэж байгаа ч ханиад томуугаар өвчлөх хүүхдүүдийн тоо буурсангүй. Нийслэлийн хэмжээнд амбулаторийн үзлэгийн 11,8 хувийг томуу, томуу төст өвчин эзэлж байна. Энэ нь өнгөрсөн жилийн мөн үеэс 6,8 хувиар нэмэгдсэн үзүүлэлт аж. Үүнээс харахад агаарын чанар энэ жил сайжрах бус улам дордсон гэлтэй. Амралтын өдрөөр агаар салхинд гарч, нийслэл хотоо холоос тольдоход суунаглаж, сааралтсан утаа битүү харагдана.

Тэгэхээр утаатай бид өөрөөр тэмцэх хэрэгтэй болж байгаа юм. Ядаж л дэд бүтцээ сайжруулж, гэр хорооллын яндангаа цөөлмөөр байна. Одоогийн байдлаар Улаанбаатар хотод 380 мянган өрх амьдарч байгаагийн 43 хувь буюу 164 мянган өрх нь орон сууцанд, үлдсэн 57 хувь буюу 216 мянган өрх нь гэр хороололд амьдарч байна.

Өөрөөр хэлбэл Нийслэлийн хүн амын бараг 60 хувь нь гэр хороолол буюу инженерийн дэд бүтцийн хангамжгүй, олон улсын жишигт үл нийцэх сууцанд амьдарч буй юм.

Эдгээр 216 мянган өрх айлыг яндангүй болгохоос л утааны тэмцэл эхэлнэ.

Ийм туршилтыг Сонгинохайрхан дүүрэгт хийгээд эхэлжээ. Тодруулбал, Монгол Улсын Засгийн газар Япон улстай хамтраад нийслэлийн Сонгинохайрхан дүүргийн арваннэгдүгээр хорооны нэг гудамжны 10 айлын дулааны асуудлыг хийн халаагуураар шийдсэн байна. Энэ хүрээнд өнгөрсөн оны 1-6 дугаар сарын хооронд тус дүүргийн айлуудад судалгаа хийжээ. Ингэхдээ аль болох нэг гудамжны байшинтай айлуудыг хамруулахыг зорьсон байна.

Үүнд хамгийн эхэнд хамрагдсан айл бол тус хорооны иргэн Б.Халиуных. Эднийх 60 м.кв байрандаа тавуулаа амьдардаг. Хийн халаалтаа тавиулаад долоон сар болж байгаа аж. Япон мэргэжилтнүүд өөрсдөө ирж, суурилуулж өгчээ. Суурилуулах үнэ нь долоон сая төгрөг.

Харин сард гарах хийн төлбөр нь дунджаар 150 мянган төгрөг болдог байна.

Өмнө нь эднийх байшингаа нүүрсээр халаадаг байхад түлшинд ойролцоогоор сард 180 мянган төгрөг зарцуулдаг байжээ. Харин одоо хийн халаагууртай болсноор сард 30 мянган төгрөг хэмнэх болсон байна. Дээр нь даарч хөрөх, шөнө босож галлах, угаартахаас айхгүй амар болжээ. Энэ тухай гэрийн эзэн Б.Халиун ярихдаа “Өмнө нь ажилдаа явахдаа гурван хүүхдээ даарч байгаа болов уу гэж их санаа зовдог байсан. Одоо орон сууцанд орчихсон юм шиг л тухтай байна. Товчлуур дараад л бол оо. Хүмүүс хий дэлбэрнэ гэж айх юм. Гэтэл энэ төхөөрөмж өөрөө ухаалаг шийдэлтэй. Арван секунд болоод л автоматаар унтарчихна. Угаартана гэж айлтгүй. Хүн өөрөө л зөв хэрэглээд сурчихвал ямар ч аюулгүй” гэсэн юм. Б.Халиуных хийн халаагуураа өглөө, оройдоо асаадаг байна. Цагаа тохируулаад тавьчихаар халаагуур өөрөө автоматаар асаад, халуун тохирсон хэмдээ ихэрээр мөн л өөрөө унтарчихна. Эднийх халууны хэмээ 21-23 градус дээр тавьдаг. Хөдөө явсан ч халаалтаа тохируулаад явчихдаг байна. Удахгүй хөрсний бохирдлоо шийдэхийн тулд боловсон нойл, душтэй болохоор зэхэж байгаа аж.

Нэг хорооны арван айлыг яндангүй болгоно гэдэг зөв эхлэл. Энэ эхлэл цааш үргэлжлэх үгүйг Сонгинохайрхан дүүргээс тодруулахад “Иргэд үүнийг маш их сонирхож байгаа. Гэвч төхөөрөмж суурилуулах төлбөр өндөр байна гэж байна. Эхний ээлжийн угсралтын зардлыг бууруулахгүй бол нийтийн хүртээл болгоход бага зэргийн хүндрэл гарахаар байна. Юутай ч хийн халаагуур хамгийн эхэнд тавиулсан айлаас харахад үр дүн сайн байна. Сард зарцуулах төлбөр нь түлээ, нүүрс түлэхтэй адил байна. Тиймээс цаашид уг төслийг хэрэгжүүлэх талаар авч хэлэлцэх байх” гэв.

Хийн төхөөрөмж айлын байшинд суурилуулахад үнэ нь м.кв-аас хамаардаг. Тухайлбал, 30-60 м.кв бол 7 сая, 60 м.кв-аас дээш бол 11 сая төгрөгийн үнэ хөлстэй байдаг байна.

Сонгинохайрхан дүүрэг эхний удаа жишиг болгож, арван айлыг хийн халаагуурт үнэ төлбөргүй холбожээ. Харин цаашдаа хэрхэхийг төр засгийн түвшинд авч хэлэлцэх биз ээ. Яндангийн тоо цөөрч л байвал утаа багасна гэсэн үг. Түүнээс биш иргэдээ хэмжээтэй түлшинд дугаарлуулаад үр дүнд хүрэхгүй л болов уу. Ядаж байхад сайжруулсан шахмал түлшний орц, найрлага нь эргэлзээтэй. Тиймээс ирэх жил утаагаа улам багасгахын тулд төр засаг илүү их ухаан зарах хэрэгтэй болж байна. Дээр нь замын хөдөлгөөнд нүүрсэн яндангүй оролцож буй автомашинуудыг журмалчихвал ч утаа аяндаа арилаад өгнө дөө. Үгүй бол Улаанбаатар хотын утаа суунагласан хэвээр байх нь.

Энэ мэдээнд өгөх таны сэтгэгдэл?
10
ЗөвЗөв
1
ХарамсалтайХарамсалтай
0
ХахаХаха
0
ХөөрхөнХөөрхөн
0
ГайхмаарГайхмаар
0
ТэнэглэлТэнэглэл
0
БурууБуруу
Баярлалаа!

Холбоотой мэдээ

8 сэтгэгдэл

News.mn сайтад сэтгэгдэл оруулахад анхаарах зүйлс

Avatar

СУДЛААЧ ИРГЭН 2020-01-13 202.9.46.60

гадаадынхан зөв зүйтэй саначлага их гарагх юм ,,хийгээд үзүүлэхи юм гэтэл манй төр засаг зөв сайхан юмыг дэмждэггүй ,,худлаа баахан мөнгшө үр дүнгүй зарцуулж утаа ядуурал ярисаар 30 боллоо ,,асуудал шийдэгдээгүй иргэд ядуу байх нь улс төрийн намуудад ашигтай байдаг байждээ ,,одоо МАН энэ японы төслийг дэмжээд газан халаалтыг хэрэгжүүээсэй энэ усани оргилуур хийх мөнгөөр 500 айлыг газаар халаах төхөөрөмжтэй болгох байж ,,мөнгөө зөв зарцуулдаг баймаара Ерөнхий сайдаа АРД ИРГЭД ИТГЭЖ НАЙДАЖ БАЙГ

Avatar

Зочин 2020-01-13 159.203.103.12

gas hii nii noots mongold barag baihgui! tiimees tsaashdaa orosoos awna gesen ug!

Avatar

Зочин 2020-01-13 64.119.27.45

Суурьлуулах үнэ нь үнэхээр зүй бус өндөр юм. Солонгост дээр үед /15 жилийн өмнө/ ийм тоноглолыг 1,5 сая воноор /3 сая төгрөг/ л хийдэг байсан. Үйлчилгээний үнэ хөлс, бараа материалын өртөг мэт нь бүгд ороод. Хийгээд сурцан өчнөөн монгол байгаадаа уг нь. Одоо бүр илүү хямд төсөр, амар хялбар болсон байх учиртай. Ер нь япончууд туслах нэрээр өөрсдийн компани, иргэддээ ажлын байр бий болгож, тэтгэж байдаг юм биш үү. Бид түүнийг нь монголжуулах л ухаан хэрэгтэй

Avatar

Зочин 2020-01-13 103.212.116.169

Ео юу вэ 60 хувь нь гэр хороололд байна шт. 1,5 саяын 900,000 нь гэр хорооллынх. Бүгдийн 21 аймагтаа тэнцүү хувааж тараа

Avatar

zochin 2020-01-13 202.131.225.150

ehnii eeljind chi yv. araas chin bid ochii

Avatar

Лхагва 2020-01-13 202.9.46.25

Томууны дэгдэлтийг агаарын бохирдлоос шууд хамааралтай гэвэл тэнэглэл Утаа буураагүй гэвэл бас л тэнэглэл Харин сайжруулсан түлш төгс шийдэл биш Хийн түлш төгс шахуу шийдэл мөн Нүүрсээр ажилладаг аж ахуйн нгэжүүдийн халаалтын тогоог хийн түлшинд яаралтай шилжүүлэх чиглэл рүү турхираад өгөөч

Avatar

Иргэн 2020-01-13 64.119.26.31

Яг үнэндээ сайжруулсан түлш бол нөгөө л нүүрс … дээх нь үеэс олон жил яригдаж байсан брикет буюу шахмал түлш, тэр үетэй харьцуулбал найрлага нь жаахан өөр байж магад!
Манайхан арчаагүй дээ л саяхнаас хийж эхэлсэн … эсвэл утаанаас мөнгө олох гэсэн хүмүүс бодлоготойгоор хойш нь татаж байсныг үгүйсгэхгүй.
Эрчим хүчний ногоон хувьсгал дэлхийн бусад улсад аль хэдийн өрнөөд, хүн байгальд хоргүй хий болон сэргээгдэх эх үүсвэрээр гэрээ дулаацуулж галаа түлж байна! Гэтэл бид хаа бна?!

Avatar

Зочин 2020-01-13 66.181.161.37

Арай л үнэтэй юмаа. 10 сая-аар суурилуулна. Сар бүр 150 мянгийг хийнд төлнө. Манайх 5 ханатай гэртэй. Сард 8 уут буюу 30 мянган төг-ийг шахмал түлш мөн энэ хэмжээний мод авдаг. Харин модоор бус хийгээр л шахмалаа асаадаг болчихмоор байна даа.

NewsMN Гар утасны хувилбар Татах
NEWS.mn

Мэдээллийн эх сурвалж