ОХУ-ын хойд талын флотууд Хар тэнгист хамтарсан сургуулилтыг 30 хөлөг онгоц, 40 нисэх онгоцны бүрэлдэхүүнтэйгээр хийж, Калибр хөлгөөс харвагч пуужин, агаараас харвагч хэт авианы баллистик пуужин "Кинжал" нарыг туршлаа хэмээн ОХУ-ын төрийн мэдээллийн агентлаг ТАСС мэдээлжээ.

Мөн "Сургуулилт амжилттай боллоо" хэмээн Оросын тэнгисийн цэргийн командлагч адмирал Николай Евменов Путинд илтгэжээ.

Хоёр МИГ-31К сөнөөгч Кинжал баллистик пуужингаар бай онож, адмирал Григовичийн усан онгоцны баг, бага оврын пуужинт хөлөг онгоц Орехово-Зуево, шумбагч Колбино онгоцууд Калибр пуужингаар сургуулилт хийж, энэ бүхнийг Путин маршал Устиновын пуужин тээвэрлэгч хөлөг онгоцны тавцан дээрээс хянажээ.

Хэт авианы пуужин гэдэг нь мач5 буюу 6173 гаруй км/цагийн хурдтай пуужин юм. Пуужин эхлээд сансарт хөөрч, эргэн маш хурдтайгаар агаар мандалд бууж, онгоцтой адил өндрөөр нисдэг гэнэ. Ийнхүү нисэх нь АНУ-ын агаараас хамгаалах хиймэл дагуул, радаруудад өртөх магадлал багатайгаараа онцлог гэнэ.

Өнгөрсөн оны арванхоёрдугаар сарын сүүлээр ОХУ-ын Ерөнхийлөгч Путин хэт авианы зэвсгийн амжилтаараа сайрхаж "Бусад орон бидний амжилтыг гүйцэх гэж хамаг чадлаараа мэрийж байна. Биднээс өөр ганц ч орон хэт авианы зэвсэгтэй болж чадаагүй" хэмээн ярьж байжээ.

Авангард гэх цоо шинэ хэт авианы пуужингийн систем ийнхүү өнгөрөгч оны арванхоёрдугаар сарын 27-нд ашиглалтанд орсон талаар хэвлэл мэдээллүүд шуугиж байсан билээ.

Эх сурвалж: cnn.com