Улаанбаатар-Дархан чиглэлийн автозамыг ашиглалтад оруулах төлөвлөсөн хугацаа нь өнгөрсөн оны арваннэгдүгээр сар боловч хугацаандаа амжихгүй он дамнан хойшлогдсон.

Дарханы замын ажлыг санхүүжүүлэгч  байгууллага нь Азийн хөгжлийн банк бөгөөд тус банкны Монгол дахь суурин төлөөлөгчийн газар болон хариуцагч мэргэжлийн инженер, зөвлөх инженерүүд замын ажлыг гэрээний хугацаандаа дуусгавар болгоход хяналт тавьж ажиллах үүрэг хүлээсэн.

Хоёр өдрийн өмнө Зам, тээврийн хөгжлийн сайд Б.Энх-Амгалан Азийн хөгжлийн банкны төлөөлөгчтэй уулзах үеэр гэрээт хугацаандаа ашиглалтад оруулахыг гүйцэтгэгч компаниудад шахаж ажиллуулахаа Азийн хөгжлийн банкны төлөөлөгч мэдэгдээд, хэрэв гүйцэтгэгч компаниуд асуудал гаргавал хар жагсаалтад оруулна гэдгээ илэрхийлжээ.

Дарханы зам ирэх зургадугаар сард ашиглалтад бүрэн орохгүй ч  харин ирэх зургадугаар сард замын хучилт бүрэн хийгдэнэ гэдгийг салбарын сайд нь тодотголоо.

ЗТХ-ийн сайд Б.Энх-Амгалан энэ тухай хэлэхдээ “Азийн хөгжлийн банктай байгуулсан гэрээний хугацааны хоёрдох шат нь зургадугаар сард дуусна. Энэ хугацаанд буюу хоёрдох шатныхаа ажлын хүрээнд бид Дарханы замыг гэрээт хугацаанд нь ашиглалтад оруулахын төлөө ажиллана. Замыг ашиглалтад хүлээж авах, хөдөлгөөн нээх ойлголтыг олон нийт андуурч ойлгоод байх шиг байна. Жишээ нь Налайхын замыг бүрэн ашиглалтад оруулаагүй, хөдөлгөөнийг нь өнгөрөгч оны арваннэгдүгээр сард нээсэн. Улсын комисс хүлээж авснаар ашиглалтад бүрэн ордог. Дарханы зам ирэх зургадугаар сард хучилтаа бүрэн авна гэж тооцоолж байгаа. Хучилтаа авна гэдэг нь Налайхын зам шиг хөдөлгөөн нь нээгдэнэ гэсэн үг” гэлээ.