ОХУ-ын Батлан хамгаалахын сайд Сергей Шойгугийн охин Ксения экстрим спортоор эмэгтэйчүүд хичээллэх нь нэмэгдэж байгаа талаар RT.com сайтад өгсөн ярилцлагадаа дурджээ. Тэрбээр спортын шинэ хөдөлгөөн буюу экстрим нөхцөлд гүйлтийн тэмцээн зохион байгуулдаг "Лига героев" компанийг 2013 онд үүсгэн байгуулсан байна. Өнөөдөр тус компани нь олон улсын түвшинд уралдаан, тэмцээн зохион байгуулах болжээ. Ксения Шойгу компаниа удирдахаас гадна тэмцээнд идэвхтэй оролцдог ажээ. Үүний зэрэгцээ тэрбээр саяхан ОХУ-ын Засгийн газрын дэргэдэх биеийн тамир, спортын хөгжил хариуцсан зөвлөлд багтсан юм.

RT.com-ийн сэтгүүлч Ксениягаас эмэгтэй хүн 50 насандаа Меланья Трамп шиг үзэсгэлэнтэй байх ёстой юу гэж асуухад тэрбээр "Эмэгтэй хүн 50 насандаа хөгжилтэй, аз жаргалтай, сэтгэл татам л байх ёстой. Харин Меланья Трамп шиг үзэсгэлэнтэй байх ёстой гэдэгтээ хүн бүр санал нийлэхгүй байх" гэсэн хариулт өгчээ.

Үүнээс гадна, тэрбээр Эверестэд авирахыг хүсдэг тухайгаа ярьжээ. Харин экстрим спортын тэмцээнд эцэг нь оролцвол хэр хүлээж авах вэ гэсэн асуултад Ксения Шойгу "Хэзээ ч  эцгийгээ оролцуулахгүй. Оролцох боломж нь байлаа ч тэр орохгүй. Учир нь Сергей Шойгу сүүлийн жилүүдэд хоккейн спортоор хичээллэхдээ анхаарал хандуулж байгаа" гэсэн хариулт өгчээ.

А.АНИР