Хоккейн залуучуудын 44 дэх удаагийн ДАШТ  Чех улсын Острава болон Тршинеч хотуудад зохион байгуулагдаж аваргаа тодрууллаа. Энэ удаагийн ДАШТ-ний шигшээ тоглолтод Канад болон ОХУ-ын шигшээ багууд тааран тоглож Канадын шигшээ баг гайхалтай эргэн ирэлт хийн 4-3 гэсэн харьцаатай ялж өөрсдийн 18 дах залуучуудын ДАШТ-ний аваргын цомоо хүртлээ. Энэхүү тоглолтын эхний гоолыг ОХУ-аас Никита Александров оруулсан ч хоёр минут хүрэхгүй хугацааны дараа Канадын Дайлан Козенс хариуг нь барин тэнцүүлсэн. Үүний дараа Григорий Денисенко болон Максим Соркин ОХУ-аас гоолдон 3-1 тэргүүлж эхэлсэн боловч Канадчууд тоглолтын төгсгөлд санаачлагыг гартаа аван  Конор МкМайкл, Канадын ахлагч Баррет Хайтон, Акил Томас нар ээлж дараалан гоолдож ОХУ-ын залуучуудын шигшээ багийг хожлоо.

Харин хүрэл медалийн төлөө Швед болон Финландын шигшээ багууд тааран тоглож Шведийн шигшээ баг 3-2 харьцаатай өнгөрсөн жилийн аваргуудыг буулгаж авлаа.

Энэ удаагийн ДАШТ “Шилдэг тоглогч”-оор Канадын шигшээн  Алексис Лафрениер шалгарсан бол мэргэн буучаар Шведийн Самуель Фагемо 13 гоолтой шалгарчээ.

Дараагийн хоккейн залуучуудын ДАШТ Канад улсад арванхоёрдугаар сарын 26-аас нэгдүгээр сарын 05-ны хооронд зохион байгуулагдана.

Б.МӨНГӨНТАМИР