АНУ-ын талаас өнгөрсөн Пүрэв гариг (2020.01.02)-ийн орой Багдад хот дах нисэх онгоцны буудалд пуужингийн цохилт өгсний улмаас Ираны Лалын хувьсгалыг хамгаалах корпусын “Кудс” тусгай анги нэгтгэлийн дарга, генерал Касим Сулеймани амиа алдсан хэргийг Тегеран аллага хэмээн үзэж буйгаа мэдэгджээ. Энэ талаар Ираны Гадаад хэргийн сайд Мохаммад Жавад Зариф твиттер хуудсаараа дамжуулан мэдэгдсэн байна.

“Кудс” тусгай корпусын командлагч асан Мохсен Резаи "Генерал Касим Сулеймани амиа алдсантай холбоотойгоор Иран АНУ-аас хариугаа авна" хэмээн твиттер хуудсаараа дамжуулан мэдэгджээ. АНУ-ын агаарын хүчний цохилтын улмаас Иракийн шиит шашинтнуудын “аль-Хашд аш-Шааби” бүлэглэлийн таван гишүүн мөн амиа алдаж, Иракийн 12 цэргийн албан хаагч бэртэж гэмтсэн байна.

АНУ-ын Батлан хамгаалах яамнаас Ерөнхийлөгч Дональд Трампын зааврын дагуу Сулейманигийн эсрэг ажиллагаа явуулсан гэдгээ мэдэгдэж, Ираны халдлагыг таслан зогсоох зорилгоор цохилт өгсөн гэдгээ хүлээн зөвшөөрчээ.

Эх сурвалж: ASSOCIATED PRESS