ОНЫ ХҮН: Хөх Монголын ХҮННҮ РОК

Арванхоёрдугаар сарын 31. Он солигдох торгон мөч ирэхэд хэдхэн цаг үлджээ. Энэ л торгон мөчтэй зэрэгцэн “NEWS” агентлаг 2004 оноос эхлэн жил бүр “Оны хүн”-ийг тодруулж ирсэн билээ. 2019 оны “Оны хүн”-ээр найман зууны дараа дэлхийг байлдан дагуулж буй Монгол эрсийг нэрлэж байна. Тэд бол Б.Дашдондогийн хөвгүүд The Hu.

“Арслан ирвээс алалдан уралдъя
Барс ирвээс байлдан уралдъя
Заан ирвээс жанчилдан уралдъя
Хүн ирвээс хүчилдэн уралдъя”.

Хү, хү, хү, хү. Ээтэн гуталтай найман монгол залуу амьсгалаа түгжиж, хөшингө байдалд орсон металл рокуудыг сэрээж, энэ цаг үеийн Чингисийн баатруудаар дуудуулж явна. Тэд үндэсний язгуур урлагаа, металл роктой хослуулан шив шинэ урсгалыг дэлхийд зарлан, Монголын шинэ экспортыг гадагшаа үйлдвэрлэж байна.

Найман зууны өмнө Их эзэн хаан Чингис дэлхийн талыг морин туурайгаар бөмбөрдөж явсан тэр жимээр Монголын рокууд "байлдан уралдаж" байгааг дэлхий нэгэнтээ хүлээн зөвшөөрчээ. Тэд хөх Монголын эрчүүд “зүрхэнд нүргэлж”, “бут ниргэж”, “галзуу авч” буйг гайхан биширсээр бас бичсээр. Хү уран бүтээлээрээ байлдан дагуулахаас гадна дүр төрх, стиль имижээрээ ч ялгарч буй.

Хамтлаг найман хүнээс бүрдсэн. Бүгд өөр өөрийн онцлог, дүр төрхтэй. “The Hu”-г 2016 онд Урлагийн гавъяат зүтгэлтэн Б.Дашдондог үүсгэн байгуулж, 2018 онд албан ёсоор “Юу вэ, юу вэ, юу вэ” нэртэй анхны уран бүтээлээ цацаж байв. “Юу вэ, юу вэ, юу вэ” дуу 2019 оны зургадугаар сард youtube дээр 12.7 сая хандалт авсан анхны амжилтаар тэл дэлхийг шуугиулж эхэлсэн юм. Эндээс Б.Дашдондогийн хөвгүүд дэлхийд Хүннү рокийг хүлээн зөвшөөрүүлэх урт холын аяндаа гарцгаасан гэхэд болно.

Хүннү рокийг төрүүлэх, “The Hu”-г байгуулах анхны санаагаа Б.Дашдондог аавынхаа нутгаас олсон гэдэг. Тэрбээр энэ тухайгаа “Аавынхаа нутагт очих үед надад төрсөн санаа юм. Би аавдаа, өвөг дээдэстээ зориулж нэг сайхан дуу хийх юм сан гэж бодож явсан. Тэр дууг яаж хийх вэ гэж бараг жил шахуу эргэцүүлсэн. Миний аавын төрсөн нутаг Ховд аймгийн Чандмань сум. Хөөмий, хархирааны эх нутаг. Маш эрчтэй, хийморьлог дуу хийх сэдлийг эндээс л олсон доо. Улмаар “The Hu” хамтлаг бий болсон” хэмээн хэвлэлд өгсөн ярилцлагадаа дурдсан удаатай.

Хамтлагийнхан Хү нэрнийхээ талаар " Хүү, хүн, хүүхэн, хүүхэд, хүмүүн гээд бүгд “ХҮ” язгууртай. Эндээс хамтлагаа The HU гэж нэрлэсэн. Нэрэн дээр гишүүд маш их санал зөрөлдсөн ч эцэстээ ингэж тогтсон" гэж тайлбарласан байдаг.

Хүннү рокуудын анхны цомгийн нэр “Гэрэг”. Тэртээх Их Монгол Улсын нэрийн хуудас болж байсан “Гэрэг” цомог “Billboard”-ийг тэргүүлсэн нь Монголын урлагийн ертөнцийн цоо шинэ, анхны амжилт байлаа. Цомог “Wolf Totem”, “Yuve yuve yu”, “Shoog Shoog” зэрэг есөн дуунаас бүрджээ.

iTunes чартын рок дууны төрөлд The HU хамтлагийн “Wolf Totem” (Чонон сүлд) уран бүтээл нэгдүгээрт, “Yuve Yuve yu” (Юу вэ, юу вэ, юу) дуу нь тавдугаарт жагссан бий. “Wolf Totem” дуу алдарт “The Queen” хамтлагийн “Bohemian Rapsody” уран бүтээлийг ардаа орхиж тэргүүлсэн нь The Hu дэлхийн чансаатай хамтлаг болсныг бататгасан нэг үзүүлэлт байв. Гэхдээ "The Hu" дөнгөж дөрөөн дээрээ гишгэх гэж байгааг хамтлагийн продюссер онцолсон бий.

The Hu хамтлаг АНУ-ын 50 гаруй оронд 60 орчим тоглолт хийж, арванхоёрдугаар сарын 10-нд эх орондоо ирсэн юм. Тэдний "байлдан дагуулалт"-ыг төр засгаас үнэлж, Их эзэн Чингис хааны төрсөн өдрөөр Чингисийн одонгоор шагнасан бөгөөд тэд өчигдөр/2019.12.30/ шагналаа энгэртээ зүүсэн билээ. Хү удахгүй Японыг, Европыг “эзлэх”-ээр бэлтгэлдээ орсон.

Монголын тал нутагт өссөн хүннү рокууд монголчууд морин дэл дээр биш монгол урлагаар дэлхийг “эзэлж” болохоо харуулсан нь энэ цаг үеийн хамгийн том “байлдан дагуулалт” байлаа. Тэд Монголын урлагийн түүхийг шинээр бичиж байна.

ИНГЭЭД ҮЕ, ҮЕИЙН “ОНЫ ОНЦЛОХ ХҮН”-ИЙГ СОНИРХУУЛЪЯ.

2004 он: Долгорсүрэнгийн ДАГВАДОРЖ

2005 он: Цахиагийн ЭЛБЭГДОРЖ

2006 он: Миеэгомбын ЭНХБОЛД

2007 он: Мөнхбатын ДАВААЖАРГАЛ

2008 он: Эрдэнийн БАТ-ҮҮЛ

2009 он: Цахиагийн ЭЛБЭГДОРЖ

2010 он: Сүхбаатарын БАТБОЛД

2011 он: Доржсүрэнгийн БОЛД

2012 он: Эрдэнийн БАТ-ҮҮЛ

2013 он: Ринчиннямын АМАРЖАРГАЛ

2014 он: Батхуягийн МӨНГӨНТУУЛ