БНСУ-ын Мунгён хотод болж буй Армийн дэлхийн спортын зуны VI наадмын чөлөөт бөхийн тэмцээн өндөрлөлөө. Өчигдөр тэмцээний 61, 70, 86, 125 кг-ын жингүүдийн барилдаан боллоо.

Тэмцээний 70 кг-ын жинд өрсөлдсөн Гавьяат тамирчин Г.Мандахнаран нэгдүгээр тойрогт Египетийн бөх Еад Ибрагимийг 10:0, хоёрдугаар тойрогт ХБНГУ-ын бөх Тим Мюлллерийг 8:0, 2:0 онооны харьцаагаар ялж, хагас шигшээ барилдаанд Азербайжаны бөх Ж.Азимовт 1:0, 6:2 онооны харьцаагаар дийлдэн, хүрэл медалийн төлөө барилдаанд Украиний бөх Е.Хабеловыг 1:0, 10:1 онооны харьцаагаар хожжээ.

Харин 86 кг-ын жинд өрсөлдсөн ОУХМ О.Үйтүмэн нэгдүгээр тойрогт Швейцарийн бөх Марко Лукас Рейзенийг 6:4, 4:0, хоёрдугаар тойрогт Өмнөд Солонгосын бөх Ким Гван Укыг цэвэр ялж, хагас шигшээ барилдаанд Оросын бөх Шамиль Кудиямагомедовт 2:6, 0:4 онооны харьцаагаар хожигдож, хүрэл медалийн төлөөх барилдаанд ХБНГУ-ын бөх Ульям Хартыг 2:0, 1:1 онооны харьцаагаар өвдөг шороодуулжээ.

Тэмцээний 61 кг-ын барилдсан Б.Хаш-Эрдэнэ нэгдүгээр тойрогтоо Швейцарийн бөх Ранди Адгин Вокийг 3:0, 1:4 онооны харьцаагаар ялж, хоёрдугаар тойрогт Украиний бөх Мукола Айвазянд 0:2, 6:8 онооны харьцаагаар хожигджээ. 125 кг-ын жинд хүч үзсэн Спортын мастер Ч.Мөнхтогтох нэгдүгээр тойрогт ХБНГУ-ын бөх Жохан Кессельд 2:5, 0:8 онооны харьцаагаар хожигджээ.

ТЭМЦЭЭНИЙ ДҮН:

61 кг

1. Жамал Отарсултанов /ОХУ, олимпийн аварга/
2. Мехран Масурифрачали /Иран/
3. Тиан Зхунгуанг /БНХАУ/
3. Елдос Абикенов /Казахстан/
…9. Б.Хаш-Эрдэнэ /”Алдар” спорт хороо/

70 кг

1. Сослан Романов /ОХУ/
2. Ж.Азимов /Азербайжан/
3. Надари Мохаммад /Иран/
3. Г.Мандахнаран /ДАШТ-ий хошой хүрэл медальт, Армийн дэлхийн аварга/

86 кг

1. Шамиль Кудиямагомедов /ОХУ/
2. Мохаммад Жавад Ебрагимизиа /Иран/
3. О.Үйтүмэн /”Аврагч” спорт хороо, Армийн дэлхийн аварга/
3. Адилет Давлумбаев /Казахстан/

125 кг

1. Владислава Байцаев /ОХУ/
2. Денг Зхавей /БНХАУ/
3. Жохан Кессель /ХБНГУ/
3. Жафар Шамснатери /Иран/
 

Эх сурвалж: МЧБХ