Солонгосын К-Поп ертөнцийн амжилттай яваа хамтлагуудын нэг болох Red Velvet хамтлагийн дуучин Wendy эмнэлэгт хүргэгдлээ. Тус хамтлаг SBS телевизийн Зул сарын баярын тоглолтод оролцохоор бэлтгэл хийж байх үеэр Wendy тайзнаас нүүрээрээ унан гэмтэл авчээ.

SM Entertainment-аас "Wendy-г түргэн шуурхай эмнэлэгт хүргэсэн. Түүний нүүр, бэлхүүс, бугуй, биеийнх нь баруун тал бэртсэн. Тэрбээр одоогоор яаралтай эмчилгээнд орсон, бид бүхэн түүний тухай шинэ мэдээ хүлээж байна. Юуны өмнө түүний эрүүл мэнд чухал учир бид түүний эмчилгээнд төвлөрнө” хэмээн мэдээлэв.

Wendy-ийн гэмтлийн улмаас Red Velvet хамтлаг баярын концертод оролцоогүй байна. Харин Red Velvet хамтлагийн гарах ёстой цаг дээр тэдний шинэ “Psycho” дууг үзүүлжээ. Red Velvet хамтлаг өнгөрсөн Баасан гариг (2019.12.27)-т болсон KBS Song Festival болон арванхоёрдугаар сарын 31-нд болох MBC Music Festival дээр хамтлагаараа оролцохгүйгээ мэдэгдсэн байна.

Б.МӨНГӨНТАМИР
Эх сурвалж: EONLINE.COM