Намайг хэн алсныг би мэднэ

Бүхэл бүтэн амьдрал өнгөрсний дараа өөрийгөө хөнөөсөн алуурчныг олж чадсан хачирхалтай түүхийг сонирхуулъя.

Сири, Израиль хоёрын дундах маргаантай бүс-Голаны өндөрлөг хавьд нэгэн хүү төржээ. 3 нас хүрэхдээ маш ухаалаг сэргэлэн, хэл ярианы хөгжил сайтай, санаагаа нэн тодорхой илэрхийлдэг болсон байна. Харин ярьсан зүйл нь эцэг эхийг нь айлгаж орхив. Хүү урьд насны амьдралаа мэдэж байж. Түүгээр ч зогсохгүй өмнөх амьдралынхаа төгсгөл үе, үхлийн шалтгаанаа хүртэл санаж байжээ.

Ямар нэгэн хэрүүл маргааны улмаас толгой руугаа сүхээр цохиулж байгаа аймшигт үзэгдэл хүүг салахгүй даган зовоодог байв. Эцэг эх нь эхлээд нэг их ойшоогоогүй ч, хүүг бүр нарийн ширийн юм яриад байхаар нь тосгоны зөвлөлдөө ханджээ.

Хүүгийн ярьсан түүх тосгоны зөвлөлийн гишүүдийн анхаарлыг маш ихээр татжээ. Учир нь тэд сүнс хүний биед шилжин ордог гэдэгт итгэдэг байсан юм. Тэдний итгэж буйгаар бол, төрмөл мэнгэ нь хүний урьд наснаас ирсэн тэмдэг бөгөөд дээрх хүү ч толгойдоо урт сунасан мэнгэтэй байсан нь хүүгийн ярьсан түүхэнд итгэхэд туслажээ.

Хүүгийн ярьсныг бататгахын тулд суурингийн хэсэг оршин суугчид хүүгийн заасан суурин руу явжээ. Тэнд хүү өөрийн урд насанд амьдарч байсан байшинг таньсан бөгөөд өөрийнх нь сүнс оршиж байсан хүний нэрийг ч санасан байна. Түүний нэрлэсэн хүн үнэхээр хүүгийн зааж өгсөн газар амьдардаг байсан бөгөөд, сураггүй алга болоод 4 жил өнгөрсөн байжээ. Хүү өөрийг нь алсан алуурчны нэрийг санаад зогсохгүй шууд гэр лүү нь чиглэжээ. "Чи намайг яаж алсныг би сайн санаж байна" хэмээн хүү гэмт хэрэгтэнд хандан хэлсэн байна. Бид ноцолдож, чи намайг сүхээр цохьсон шүү дээ” гэхэд алуурчин цас шиг хувхай цайсан хэдий ч гэмээ хүлээгээгүй байна.

Тэгэхэд, хүү овоолсон чулуу руу зааж цогцос тэнд булаатай байгаа хэмээв. Үнэхээр тэнд гавлын ясандаа гэмтэл авсан нэгэн хүний цогцосыг олжээ. Цогцосны гавалд байсан шарх хүүгийн толгой дахь мэнгэний байрлалтай давхцаж байв. Маш олон нотлох баримт гарч ирсэнээр алуурчин гэмээ хүлээхээс аргагүй байдалд хүрчээ. Үүнээс хойш, хүүг өмнөх амьдралынх нь аймшигт дурсамж зовоохоо больсон байна.

Энэхүү баримтыг, олон эрдэмтэд судалсан бөгөөд хүн нас барсаны дараа сүнс нь өөр биед дахин төрдгийн баталгаа хэмээн үзсэн байна. Энэхүү түүхийг германы эмч Трутца Хардо өөрийн дуулиант ном "Өмнө нь амьдарч байсан хүүхдүүд: Хойд дүр өнөөдөр" хэмээх номондоо тодорхой дурдсан байдаг байна.