Академич Б.Бямбаагийн бүтээлд 100 сая төгрөг олгоно | News.MN

Академич Б.Бямбаагийн бүтээлд 100 сая төгрөг олгоно

Академич Б.Бямбаагийн бүтээлд 100 сая төгрөг олгоно

Академич Б.Бямбаагийн бүтээлд 100 сая төгрөг олгоно

Монгол Улсын Засгийн газрын ээлжит хуралдаанаас Академич Б.Бямбаагийн “Паразиттах өвчтэй малыг эмчлэх, сэргийлэх дэвшилтэт технологи” бүтээлд шинжлэх ухаан, технологийн салбарын 2019 оны “Технологийн дэвшлийн шагнал”, 100 сая төгрөг олгохоор шийдвэрлэжээ.

ХААИС-ийн Мал эмнэлгийн хүрээлэнгийн эрдэмтэн, академич Б.Бямбаагийн “Паразиттах өвчтэй малыг эмчлэх, сэргийлэх дэвшилтэт технологи” бүтээл нь Мал эмнэлгийн хүрээлэнд сүүлийн 20 гаруй жилийн хугацаанд хийгдсэн эрдэм шинжилгээ, туршилт, зохион бүтээх ажлын үр дүн юм.

Дэлхийн шилдэг зохион бүтээгч нарт олгодог Дэлхийн оюуны өмчийн байгууллагын алтан медалийг 2006 онд хүртсэн энэхүү бүтээлийн мөн чанар нь нэг нь нөгөөгийнхөө үр дүнг нөхөн улам бүр лавшруулан залгамжит байдлыг хангасан иж бүрдэл, үйлчилгээний өндөр идэвхтэй эм бэлдмэлийг үйлдвэрлэх хэд хэдэн цуврал технологийг бий болгосонд оршино.

Монгол орны мал сүрэгт шимэгчлэн амьдарч үхэл хорогдол, эдийн засгийн ихээхэн хохирол учруулдаг гадар 54, дотор 178, нийт 232 зүйлийн шимэгчээр үүсгэгддэг паразиттах өвчнийг эмчлэх, сэргийлэх технологийг бий болгохдоо тэдгээр шимэгчдийн биологийн онцлог, оршин амьдрах ерөнхий зүй тогтлыг нээн илрүүлж, амьдралыг нь малын бие махбодид таслан зогсоох онолын шийдлийг олж тогтоожээ.

Энэхүү бүтээлийн ач холбогдол нь үндэсний баялаг болсон мал сүргийг паразиттах өвчнөөс эрүүлжүүлэх төдийгүй паразит зооноз, бэтэг, финоз зэрэг хэд хэдэн аюулт өвчнөөс хүн амыг хамгаалах, Монгол улсын төрөөс үндэсний үйлдвэрлэлийг сэргээн хөгжүүлэх, импортын барааг орлох бүтээгдэхүүний үйлдвэрлэлийг нэмэгдүүлэх талаар баримталж буй бодлогыг хэрэгжүүлэх, мал эмнэлгийн шинжлэх ухааныг дэлхийн жишигт хүргэх, эх орныхоо үндэсний баялгийг арвижуулах, эдийн засаг, хүн амын аюулгүй байдлыг хангах, малчдын амьдралыг сайжруулахад чухал хувь нэмэр оруулсанд оршиж байгаа аж.

Б.ЖАРГАЛ

"Болор дуран"-аар шалгав.
Энэ мэдээнд өгөх таны сэтгэгдэл?
3
ЗөвЗөв
0
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

Холбоотой мэдээ

0 сэтгэгдэл

News.mn сайтад сэтгэгдэл оруулахад анхаарах зүйлс

NewsMN Гар утасны хувилбар Татах
NEWS.mn

Мэдээллийн эх сурвалж