Викториа хүрхрээ хүн төрөлхтнөөс аврал эрж байна

Бүгд найрамдах Замби болон Зимбабвен хоёр улсыг хиллэн оршдог дэлхийд гайхагдсан Викториа хүрхрээ ширгэсээр 25 жилийн түүхэндээ хамгийн бага устай болоод байна.

Уг хүрхрээ жил бүр улирлын чанартайгаар ширгэдэг ч энэ жилийн хувьд 50 хувиар илүү ширгэжээ.

Замби улсын Ерөнхийлөгч Эдгар Лунгү үүнийг дэлхийн дулааралтай холбоотой тайлбарлаж байгаа бөгөөд дэлхийн дулаарлын үр нөлөөг Африкийн улс орнууд хамгийн ихээр амсаж байгааг онцлоод "Та бидний үр хойч Африкт ирээд агуу Викториан хүрхрээг үзэж чадахгүй юм гэж үү? Энэ бидний хүссэн зүйл мөн билүү? Бид одоо л хичээх хэрэгтэй. Итгэл найдвар арай ч тасраагүй байна. Хөгжилтэй, баян улс орнууд дэлхийн дулаарлын эсрэг дорвитой тэмцэж, ядуу буурай улс орнуудаа ч тэмцэлдээ хөтлөх хэрэгтэй байна. Замби улсад ялангуяа хуурайшил маш хүчтэй нөлөөлж, сая сая хүн өлсгөлөнд нэрвэгдэж байна. Дэлхийн дулаарлын асуудлыг улстөржүүлж тоглоод байх цаг зав бидэнд байхгүй. Энэ бол үнэхээр чухал, ноцтой асуудал. Манай улсад ирсэн жуулчид интернэтээс харсан бүхэн нь алга байхыг хараад нүдэндээ ч итгэхээ байсан. Та нар өөр ертөнцөд амьдарч байна. Тэр хооронд чинь дэлхийн дулаарлыг Африкчууд маш хүчтэй мэдэрч байна" хэмээн ярьжээ.

Замби, Зимбабве улсууд өдөр бүр тогны хязгаарлалт хийж, ард иргэдийнхээ хүнсний хэмжээг албан шаардлагаар огцом багасгаж, Замбийн хоёр сая гаруй хүн ард, Зимбабвен долоон сая ард түмэн өлсгөлөнд нэрвэгдээд байгаа билээ.

Харин Зимбабвен аялал жуулчлалын эрх мэдэлтнүүд дээрх асуудлыг үгүйсгэж "Жилийн энэ үед хүрхрээн ус багасах нь энгийн үзэгдэл. Хүрхрээ хэзээ ч бүрмөсөн ширгэдэггүй. Одоо урсаж байгаа ус өмнөх жилийнхээс бага байгаа нь үнэн ч, арай ч бас хатчихаагүй байгаа" хэмээн тайлбарлажээ.

Дээрх мэдээллийг Зимбабвен байгаль орчин, аялал жуулчлалын яамны цаг уурын өөрчлөлт судалгааны албаны дарга Элиша Моёо үгүйсгэж, "Викториа хүрхрээний ус жил ирэх тусам улам багасч байна. Ингэсээр нэг л өдөр гэхэд хүрхрээ бүрмөсөн үгүй болохоор байна" хэмээн мэдэгдсэн байна.

Викториа хүрхрээ бол 1708 метр өргөн, 108 метр өндөр, дэлхийн хамгийн том хүрхрээ билээ.