Монголын загварын ертөнцийн хамгийн том ёслол болох ‘Гоёл’ наадам өнгөрөгч долоо хоногт /2019.11.30/ Соёлын төв өргөөнд болж, отгон топ модель тодорсон. Загварын хүрээллийнхний хүсэн хүлээсэн 32 дахь удаагийн ‘Гоёл-2020’ наадмын энэ жилийн Топ моделиор загвар өмсөгч Д.Долгион өргөмжлөгдсөн билээ. Ингээд түүний яриаг хүргэе.

-Юуны өмнө уншигчдынхаа өмнөөс “Гоёл” наадмын отгон Топ моделиор шалгарсанд баяр хүргэе. Үзэгчид тайзнаа гарахад нь алга ташин хүлээн авч байсныг анзаарсан. Сэтгэгдлээсээ хуваалцахгүй юу?

-Маш их баярлалаа. Миний хувьд 32 жилийн түүхт “Гоёл-2020” наадамд Монгол Улсын 20 дахь Топ модель хэмээх эрхэм цолыг хүртсэндээ маш их баяртай байна. Наадмын төгсгөлд цом гардан авахад амьдралын минь дахин давтагдашгүй сайхан мөч байлаа. Намайг олон жил итгэл, сэтгэлээрээ дэмжиж байсан баг хамт олон, гэр бүл, найз нөхдөдөө баярлалаа гэж хэлмээр байна. Энэ бол бид бүхний шагнал юм болов уу гэж бодож байна.

Хүн бүр дотроо ямар нэгэн таамаг дэвшүүлж байсан байх. Мундаг уран бүтээлч, уран гартай дизайнерууд улам нэмэгдэж, өрсөлдөөн ихэсч байгаа нь сайшаалтай. Намайг дэмжиж байгаа хүмүүстээ дахин талархаж байгаагаа илэрхийлье. Монгол Улсын иргэнийхээ хувьд өөрийн чадах салбартаа хувь нэмрээ оруулж байгаадаа баяртай байна. Цаашдаа улам хичээх болно.

-Энэ жилийн “Гоёл” наадмын зохион байгуулалтыг зарим хүмүүс цомхон болсон гэж шүүмжилж байсан.  Таны хувьд энэ жилийн наадам ямар онцлогтой болж өнгөрсөн бэ?

-“Гоёл” наадам жил бүр дахин давтагдашгүй болдог гэж боддог. Энэ жилийн хувьд олон шинэ моделиуд оролцохоос гадна үндэсний үйлдвэрлэгч, дизайнерууд гээд өргөн хүрээтэйгээр оролцож, илүү чанаржсан юм шиг санагдсан. Мөн урилгаар олон улсын зочид, шүүгчид ажилласан нь монголын хувцас загварын салбарын хөгжилд чухал ач холбогдолтой болсон болов уу.

-“Гоёл” наадамд оролцох моделиудыг хэрхэн шалгаруулдаг вэ?

-Монголын хувцас загварын анхдугаар түүхэн наадам гэдэг утгаараа оролцох моделиудыг орон даяар шалгаруулдаг. Модель хүнд дүр төрх чухал байхаас гадна биеийн харьцаа, алхааны техник, сонсгол, гэрэл тайзны мэдрэмж, туршлага, ёс зүй гээд маш олон шалгуур тавьдаг.

–Таны хувьд “Гоёл” наадамд хэд дэх жилдээ оролцож, Топ моделиор тодров?

-Монголын загварын ертөнцөд Топ модель нь хамгийн том цол. Тийм учраас асар их үүрэг хариуцлага, хичээл зүтгэл дагалддаг юм болов уу. Миний хувьд “Гоёл” наадамд 13 дахь жилдээ оролцлоо. Өнгөрсөн жил “Miss Universe” олон улсын миссийн тэмцээнд эх орноо төлөөлөн анх удаа амжилттай оролцож, хугацааны хувьд давхцаж таарсан учраас наадамдаа оролцож чадаагүй.

-Загварын тайзнаа анх хэрхэн хөл тавьсан тухайгаа яриач. Багын өндөр охин байв уу?

-Хүүхэд бүр олон мөрөөдөлтэй байдаг шүү дээ. Миний хувьд загвар өмсөх нь мөрөөдлүүдийн минь нэг хэсэг байсан. Бага байхдаа өөрөө загвар зохион бүтээж, тэмцээнд хүртэл орж байлаа. Би анх “Эра” төвийн загварын дамжаанд орж, гараагаа эхэлсэн. Ер нь л бага байхын л ангийнхаа өндөр нуруутай охидын нэг байсан юм.

–Гэр бүл төлөвлөлтийн хувьд ямар бодолтой явдаг вэ?

-Амьдралд маш олон хүсэл мөрөөдөл, зорилго бий. Гэхдээ тэр дундаас хамгийн чухал нь гэр бүл гэж боддог. Мэдээж гэр бүл төлөвлөлтөө бодож байгаа. Цаг нь ирэхээр болох байх. Ирээдүйд хийхийг хүсч, суралцах зүйл ч их байна.

-Хамгийн олон жил болон бага хугацаанд загвар өмсч Топ моделиор тодорсон модель гэвэл?

-“Гоёл” наадмын Топ моделиор тодорсон моделиудаас харахад ихэвчлэн 10 гаруй жил энэ салбартаа хүчин зүтгэж, хичээж хөдөлмөрлөсөн хүмүүс байдаг.

-Саяхан “Хүмүүнлэгийн элч” мисс болсон шүү дээ. Энэ тухайгаа яриач?

-Миний хувьд аль болох хүмүүнлэгийн үйлсэд идэвхтэй оролцохыг хичээдэг. Өөрийнхөө хэмжээнд бага ч гэсэн тусламж хэрэгтэй байгаа газарт хүрч ажиллах юм сан гэж боддог. Мөн мундаг сайн үйлстэн ах, эгч нараасаа суралцаж явдаг. Би “Хүмүүнлэгийн элч”-ийн шагнал авсандаа ичингүй байгаа. Гэхдээ энэ шагнал бол алдар нэрийн шагнал биш гэж боддог.

Тиймээс цаашдаа олон хүмүүнлэгийн үйлст хувь нэмрээ оруулж, хүмүүсийн итгэлийг дааж явахыг хичээх болно. Өнөөгийн нийгэмд сайхан сэтгэлтэй хүмүүс олон байдгийг хараад амьдрал дэндүү баялаг, сайхан өнгөтэйг ухаардаг.

-Мисс, Топ модель бүсгүйн үндсэн мэргэжлийг сонирхож болох уу?

-Би маркетинг, хүний нөөцийн менежмент мэргэжилтэй. Одоогоор “Golden International beauty association” Монгол дахь захирлаар ажиллаж байна.

-Загвар өмсөхөөс гадна ямар авьяастай вэ. Кинонд тоглох санал ирж байсан уу. Цаашид кинонд тоглох санал ирвэл хүлээн авах уу?

-Надад хааяа кинонд тоглох санал ирдэг. Би баярлаж хүлээн авдаг хэдий ч мэргэжлийн жүжигчин хүн биш учраас татгалздаг. Манай уран бүтээлчид их мундаг шүү дээ. Харин би кино урлагийг шимтэн үздэг үнэнч үзэгч нь юм.

-Ихэнх хүмүүс Топ моделиор тодроод л карьер нь дуусдаг гэж ойлгодог. Ирээдүйн хүсэл мөрөөдлөөсөө хуваалцахгүй юу?

-Ирээдүйд хийхээр төлөвлөсөн хүсэл мөрөөдөл, төлөвлөгөө их байна. Топ модель гэх хүндтэй цолыг улам хүчтэй, зоригтой урагшлах замыг минь өнгөлж өглөө. Тиймээс энэ шагнал загварын карьераа дуусгах цол биш.

-Алтны магнат Ц.Мянганбаяр “Гоёл” наадмыг санхүүжүүлэхээ больсон гэж үнэн үү?

-Би танихгүй, мэдэхгүй зүйлээ хэлж мэдэхгүй байна. Одоо үед хувцас загварын салбар дэлхийд ямар их хөгжиж, хүчээ авч байгаа билээ. Монгол Улс ч гэсэн энэ чиглэл рүү хөгжиж байна. Энэ салбарын хэдэн мянган хүний хичээл зүтгэл, хөлс хөдөлмөрийг дэмжин ажиллаж буй спонсор байгууллагуудаас гадна үндэсний үйлдвэрлэгч, дизайнерууд, моделиуд, уран бүтээлчдэдээ талархлаа илэрхийлье.

А.СҮРЭН