Испанийн Ла лигийн 5 дугаар тойргийн тоглолтууд долоо хоногийн дундуур болж байгаа билээ. Өнгөрсөн шөнө улирлыг гайхалтай эхлүүлээд байсан “Сельта” клуб талбайдаа “Барселона” клубыг хүлээж авч, 4:1-ээр буулгаж авч, шуугиан тарилаа. Ингэснээр “Сельта” таван тойрогт 4 хожиж, нэг тэнцсэн амжилтаар 13 оноотой явж байна.

Тоглолтын 26 дахь минутад Нолито гоолдож, тооны харьцааг нээсэн. Ингэснээр тэрбээр лигийн 5 дахь гоолоо оруулж, мэргэн буучийн жагсаалтад бичигдэж эхлээ. Тэгвэл Яго Аспас 30, 56 дахь минутад хоёрыг оруулж, “Барса”-гийнхныг шоконд оруулсан. Байдал хүндэрсэн үед буюу 80 дахь минутад Неймар нэг гоол оруулж, Каталоны баг өндийх гэж оролдсон ч 83 дахь минутад Гвидетти эцсийн цэгийг нь тавьж, хүчтэй өрсөлдөгчөө буулгаж авчээ.

Тэгвэл нөгөө талд нээлтийн тоглолтод тэнцээд байсан “Реал” ширүүхэн өрсөлдөгч болох “Атлетик” клубын талбайд зочилж, 1:2-оор буулгаж авлаа. Ингэснээр хожигдоогүй цувралаа үргэлжлүүлж, 13 оноотой хүснэгтийг тэргүүлж эхэллээ. Мэдээж тэд гоолын зөрүүгээр нэгдүгээр байрт бичигдэж байгаа юм.

Талбайн эздээс Сабин Мерино 67 дахь минутад нэг гоол оруулсан. Тэгвэл “Реал”-аас Бензема 19, 70 дахь минутад хоёрыг хийжээ. Ингэснээр Франц эр 5 гоолтой болж, мэргэн буучийн жагсаалтыг Роналдо, Нолито нарын хамтаар тэргүүлж байна.

Дээр дурьдсан хоёр багаас гадна ганц ч хожигдоогүй нэг баг байгаа нь “Вильярреал”. Өнгөрсөн шөнө “Шар усанд шумбагчид”,  “Малага” клубын талбайд зочилж, 0:1-ээр хожсоноор мөн 13 оноотой болсон.  Тоглолтын хувь заяаг шийдсэн цорын ганц гоолыг Тиссоне өөрийн хаалгандаа оруулжээ.

Бусад тоглолтын үр дүн
Райо Вальекано 2 – 1 Спортинг Хихон
Лас-Пальмас 2 – 0 Севилья
Леванте 2 – 2 Эйбар

Н.ПУНЦАГБОЛД

Эх сурвалж: www.mminfo.mn