Зэвсэгт хүчний Жанжин штабаас өнөөдөр хэвлэлийн бага хурал зарлажээ.  “НҮБ-ын Энхийг сахиудах ажиллагаанд  Монгол Улсын Зэвсэгт хүчний оролцоо”сэдвээр Жанжин штабын удирдлагууд мэдээлэл хийх бөгөөд өнгөрсөн хугацаанд манай зэвсэгт хүчнийхэн хаана хаана хэрхэн алба хаасан талаарх бүхий л мэдээллийг тэрхүү хурлын үеэр сонсож болох юм байна. 2002 оны наймдугаар сард Зэвсэгт хүчний хоёр офицер Бүгд Найрамдах Ардчилсан Конго Улс дахь НҮБ-ын энхийг сахиулах ажиллагаанд үүрэг гүйцэтгэж эхэлсэн нь манай улсын хувьд НҮБ-ын энхийг сахиулах ажиллагаанд оролцсон анхны тохиолдол байжээ.  2002 оны арванхоёрдугаар сараас Баруун Сахар, 2005 оноос Судан, 2006-2008 онд Этиоп ба Эритрей, 2007-2009 онд Гүрж Улсууд дахь НҮБ-ын энхийг сахиулах ажиллагаанд цэргийн ажиглагчаар нийт 62 офицер /Баруун Сахарт 25, Конгод 16, Суданд 11, Этиоп ба Эритрейд 8, Гүржид 2/ үүрэг гүйцэтгээд байна.

Монгол Улсын зэвсэгт хүчнээс дэлхийн 3 тивийн 10 улсад НҮБ-ын энхийг сахиулах болон олон улсын бусад ажиллагаанд нийт 3455 цэргийн алба хаагч үүрэг гүйцэтгэсэн бөгөөд өнөөгийн байдлаар зургаан  улсад 615 цэргийн алба хаагч үүрэг гүйцэтгэж байгаа юм байна.

Д.Цээнэ