Цаг уур халуун байгаа нь цахилгааны хэрэглээг өмнө байгаагүй аюултай
өндөр төвшинд хүргээд байна гэж Өмнөд Солонгосын “Чосун Илбо” агентлаг
мэдээлж байна. Өнгөрсөн пүрэв гаригт өдрийн 15 цагийн байдлаар
цахилгааны хэрэглээ 67.629 сая kW хүрсэн нь энэ зуны дээд амжилтыг
тогтоолоо гэж Өмнөд Солонгосын Мэдлэгийн Эдийн засгийн яам мэдээллээ.
Энэ нь энэ оны нэгдүгээр сарын 13-нд цахилгааны хэрэглээ 68.963 сая kW
хүрч бүх үеийн дээд төвшинд хүрч байжээ. Цахилгааны хэрэглээ энэ
байдлаараа үргэлжилбэл наймдугаар сард одоо байгаагаас ч өсөх төлөвтэй
байна.

Долдугаар  сарын 1-20-ны хооронд хэрэглэсэн цахилгааны хэмжээ өнгөрсөн
оны мөн үеийнхээс 9.3 хувиар илүү байна. “Халуун, бүгчим байгаа нь
цахилгааны хэрэглээг ихсэхэд нөлөөлж байна. Хэрвээ цахилгааны нөөцийн
хэмжээ зургаан хувиас доош буух юм бол бид зарим бүсүүдэд, өдрийн цагаар
тодорхой ху­га­­цаанд цахил­­гааны хяз­гаар­лалт хий­хээс аргагүй” гэж
тус яам мэдээлжээ.

Москвагийн түүхэн дэх хамгийн халуун сар болов

2010 оны долдугаар сар Москвагийн түүхэн дэхь хамгийн халуун сар болж
байна гэж тус хотын цаг уурын товчоо баасан гаригт мэдэгдлээ.
Зургадугаар сарын дунд үеэс тус хотын цаг агаар хүчтэй халж эхэлсэн
бөгөөд ойрын үед халуун цельсийн 30 градусаас доош буух төлөвгүй байна.
“Ийм халуун цаг уур сүүлийн 130 жил манай хотод тохиолдож байгаагүй” гэж
тус товчоо мэдэгдэлдээ дурдсан байна. Москва хотыг тойрсон Москва мужид
мөн халуу шатсаар байгаа бөгөөд үүнээс болж зарим газар ой хээрийн
түймэр дэгдээд байна. Аагим халууныг түр ч болов аргалах гэсэн
Москвачууд хотын усан оргилууруудад орох буюу голын хөвөөнд сэрүүцэж,
метроны хонгил бараадаж байна. Эмэгтэйчүүд өндөр өсгийтэй туфлиэ тайлж
углааш өмсөж, шинэ усны хувцас авцгааж байна. Москва хотын дэлгүүрүүдэд
сэрүүцүүлэгч, агаар тохируулагчид (air conditioner) ховор болоод байгаа
тул зуслангийн байшинтай, дачатай хүмүүс хийлдэг бассейн авч тавих
болжээ.

Халуун байгаатай холбогдуулан Арми цэргүү­дээ ханцуйгаа эргүүлж,
цамцныхаа товчыг тай­ла­хыг зөвшөөрсөн гэнэ. Түүнчлэн 20 дугаар зуу­ны
эхэн үеийн эсгий дүрэмт хувцас өмсөж, морь унаж харуул хийх нь өнөөгийн
цаг уурт төдий­лөн тохиромжгүй байгаа тул Москвагийн Кремль дэхь
уламжлалт явган цэргийн харуулыг түр хугацаагаар зогсоосон байна. Орост
болж буй энэ халуун нь дэлхийн дулаарлын үзэгдэлтай хол­боотой гэж
байгаль хамгаалах үзэлтнүүд ярьж бай­на гэж Оросын “РИА Новости”
агентлаг мэдээл­лээ.

Британичууд улам их ууж байна

“Fuller Smith & Turner”-ын орлого цаг ууртай холбоотойгоор 4.1
хувиар өссөн байна. “London Pride” зэрэг пиво үйлдвэрлэдэг “Fuller”-ын
ашиг цаг ууртай холбоотойгоор өсс­өн байна. Чисвикийн Теймс голын эрэг
дээр байр­ладаг 165 жилийн түүхтэй тус компани Английн өмнөд нутагт 366
пабтай бөгөөд долоон сарын дундуур пивоных нь борлуулалт 4.1 хувиар
өслөө, үүнд цаг уур халуун байгаа нь нөлөөллөө гэж “The New York Times”
мэдээллээ. “Цаг уур халуун байгаа нь l”ALE” төрлийн пивоны борлуулалтанд
сайн биш байгаа ч “lager” пивонд сайн байна” гэж тус компанийн Майкл
Тюрнер ярьж байна.

Дэлхийн хөлбөмбөгийн цомын тэмцээний үеэр пивоны борлуулалт сайн байна
гэж таамаглаж байсан ч Их Британийн баг тоглолтын дундаас хасагдсан нь
фанатуудынх нь урмыг хугалж, борлуулалт таамаглаж байсан шиг сайн
байгаагүй. “Robinsons”, “Tango”, “Fruit Shoot” зэрэг брендийн зөөлөн
ун­даа үйлдвэрлэдэг “Britvic” ком­панийн бор­луу­лалт өсөөд байгаа
бө­гөөд долдугаар сарын дөрөв­ний байдлаар улирлын борлуулалт нь 16
хувиар нэмэгдэж 289.5 сая паунд болсон байна.

Тарвас хүртэл тэсгэл алдах болжээ

Баасан гаригт Нью-Йоркоос хойд зүгт 100 орчим миль зайд байдаг Литтл
Рокт температур Фаренгейтын 103  /цельсийн 39.4/градус хүрсэн байна. Энэ
нь 1934 оноос хойш тохиолдож байгаагүй халуун юм. Агаарын чийглэг их
байсан тул энэ нь бараг 110 / цельсийн 43.3/ хэмийн халуунтай дүйж байв.

Цаг агаар халуун байх нь тарваст сайн хэдий ч хэт их халах нь тарвасын ч
тэвчээрийг бардаг гэнэ. Дэлхийн хамгийн том тарваснуудыг тариалдаг тус
хотынхон 1920-иод оноос тарвас тариалж эхэлсэн бөгөөд тус хотод ургасан
268 паунд /121 кг/ жинтэй тарвас Гиннесийн номонд бичигдсэн гэнэ. Литтл
Рок хотын тарвас тариалагчдын холбооны захирал Марк Кейт “Хэрвээ агаарын
температур Фаренгейтын 94-95 хэмээс илүү халах юм бол тарвасны ургалт
удааширдаг” гэж ярьсан байна.Түүнчлэн Нью-Йоркийн ойролцоо их халах нь
Умард Каролина, Мичиганы өрсөлдөгчдөд нь сайн мэдээ болох болно гэж “The
New York Times”-ын сурвалжлагчид ярьжээ.

Т.Бадрах