Хуулиа мэддэггүй юу, "хулгай" нь баригдахаар мэдэн будилав уу. Цэцийн гишүүнээс эхлээд Цагдаагийн ерөнхий газрын дарга нь албан хэрэгцээнд унах автомашинаа хувийн хэрэгцээнд ашиглаж байгаад баригдсан атал хариуцлага тооцох эрх зүйн зохицуулалт байхгүй гээд Засгийн газрын хэрэг эрхлэх газрын дарга Л.Оюун-Эрдэнэ нь худлаа яриад зогсож байх юм.

УИХ-аас 2017 онд баталж, 2019 оны нэгдүгээр сарын 1-ээс хэрэгжиж эхэлсэн Төрийн албаны тухай хуулийн 39 дүгээр зүйлийн 39.1.11-д албаны бус зорилгод байгууллагын эд хөрөнгө, техник хэрэгсэл, санхүүгийн эх үүсвэр, мэдээллийн хангамж болон албаны мэдээллийг ашиглан завшихыг хориглоно.

Төрийн захиргааны болон үйлчилгээний албан хаагчийн ёс зүйн дүрмийн 3.1.2.в: төрийн байгууллагын эд хөрөнгө, техник хэрэгсэл, албаны мэдээллийг хувийн зорилгоор ашиглахыг хориглоно.

Төрийн албаны тухай хуулийн 48 дугаар зүйлийн 48.1: 39 дүгээр зүйлийг зөрчсөн бол зөрчлийн шинж байдал, анх буюу давтан үйлдсэнийг харгалзан 48.1.4 төрийн албанд гурван жилийн хугацаанд эргэж орох эрхгүйгээр халах гэж заажээ.

Өөрийнх нь баталсан хууль хүчин төгөлдөр үйлчилж байхад хариуцлага тооцох боломжгүй гэх зүйл яриад зогсоно гэдэг бол бас л их эр зориг шүү.

Япон зэрэг оронд сайд нь ийм худал мэдээллийг олон нийтэд өгсөн бол уучлал гуйгаад шууд л огцорно. Харин Монголд худал ярьсан ч бараг соёл болж, тогтох шинжтэй.

Нэр хугарахаар яс хугар гэх үг бий, ядаж энэ үгийг бодоод Засгийн газрын тэргүүн нь хуулиа биелүүлээгүй дарга нартаа, мөн худлаа ярьсан сайддаа хариуцлага ярих биз ээ гэж найдъя.

Төрийн албаны зөвлөл, Тээврийн цагдаагийн газраас хамтран арваннэгдүгээр сарын 11-нд зохион байгуулсан шалгалтад дараах байгууллагуудын нэр дээр бүртгэлтэй автомашинаар хүүхэд сургууль руу нь зөөсөн зөрчил бүртгэгджээ.

American school дунд сургууль 

British school of Ulaanbaatar дунд сургууль

“Орчлон” дунд сургууль

Монгол-Оросын хамтарсан 3 дугаар сургууль

Г.ХОРОЛ