Монголын багш нарын холбооноос Монгол улсын үндсэн хуульд нэмэлт, өөрчлөлт оруулах гэж байгаатай холбогдуулан боловсролын агуулгад өөрчлөлт оруулах чиглэлээр ажлын хэсгийн саналыг УИХ-д хүргүүлж байгаа талаараа өнөөдөр /2019.10.30/ мэдээллээ. Тэд, иргэд хувийн сургууль байгуулан ажиллуулах тухай заалтыг хасах заалтыг эргэж харах ёстой гэдгийг онцолллоо.

Үндсэн хуулийн "Хүний эрх, эрх чөлөө" гэсэн хоёрдугаар бүлгийн 16 дугаар зүйлийн 7-т "Иргэд төрөөс тавих шаардлагад нийцсэн хувийн сургууль байгуулан ажиллуулж болно" хэмээн заасан байдаг. Монголын багш нарын холбооны зүгээс хэт олон хувийн сургууль байх нь боловсон хүчнийг сулруулах сөрөг нөлөөтэй аж.  Тиймээс боловсрол олгоход хүнийг адил тэгш үзнэ, боловсролын үйлчилгээ хүн бүрд тэгш боломжийг олгоно, боловсролын агуулга аливаа шашин, үзэл суртлаас ангид байна, ерөнхий боловсролоор монгол хүн, монгол улсын иргэн бэлтгэнэ,  мэргэжлийн боловсролоор үндэсний хүний нөөцийг чадваржуулж чанаржуулна, багш ерөнхий боловсролын сургууль, сургуулийн өмнөх боловсролын байгууллагад мэргэжлийн ажиллах нөхцөл, бололцоог төр бүрдүүлнэ гэсэн заалт нэмэх ёстой гэсэн саналыг УИХ-д хүргүүлж байна гэв.

Э.АРИУН