Ухаалаг гар утас гангараа биш өдөр тутмын хэрэглээ болсон энэ цагт гар утас үйлдвэрлэгчдийн өрсөлдөөн улам нэмэгдсэн. Samsung компанийн хувьд S болон Note загвар, залууст зориулсан A, E, J загварууд гээд сонголт ихтэй байдгаараа онцгойрдог.

Энэ удаад Samsung Galaxy S6 Edge + буюу S загварын хамгийн сүүлийн гайхамшигт утасны нээлтийн хэвлэлийн бага хурал Шангри-Ла зочид буудалд болж өнгөрлөө.

Samsung корпорацитай албан ёсны стратегийн түншлэлтэй Юнител групп уламжлал ёсоороо энэхүү ажиллагааг зохион байгуулав. Сүүлийн 3 жил Юнител групп “Samsung Hello” хөтөлбөр, S5, S6, Note III, Note IV гар утасны нээлтийг зохион байгуулж байгаа бөгөөд S6 гар утасны нээлт нээгдээд удаагүй Hunnu Mall-ийг доргиож байсныг уншигчид маань санаж байгаа.

Шангри-Ла зочид буудлын Парис, Бээжин танхимыг нийлүүлэн тохижилт хийж, Хэвлэлийн бага хурал гэж даруухан нэрлэсэн ч даацтай болсон арга хэмжээнд олны танил хүмүүс ч олноороо хүрэлцэн ирсэн байлаа.

Сэтгүүлчдийг камергүй ирээрэй хэмээн урьсан нь учиртай. Мэргэжлийн камерны 4K бичлэгийг алгын чинээ гар утсаар бичиж, бичлэг нь эфирийн шаардлага бүрэн хангана гэдгийг гайхуулаад авав. Телевизийнхэн маань одоо бүгдээрээ энэ утас руу хошуурна даа. Гэрэл зурагчид ч ялгаагүй.

“Санчиртай сагс тоглоорой” гэхэд нь эхлээд гайхаж байсан ч танхимд ороход Т.Санчир асар том лед дэлгэцтэй холбогдсон S6 Edge + утсаар хүссэн хүмүүстэй сагс тоглоод сууж байв. Санчирыг хожиж болох цорын ганц боломж гэж бодоод дугаарлан байж тоглосон ч үнэхээр дийлсэнгүй. Гар утас нь 4GB рамтай тул ямар ч тоглоомыг тоглоход гацахгүй хүчин чадалтай гэнэ.

Samsung утасны гайхуулдаг олон зүйлсийн нэг нь камер. Тэгвэл S6 Edge + утасны анхны хэрэглэгч болсон жүжигчин Мөнхсоёлтой хамт зургаа авахуулж, тэр дор нь угаалган авах завшаан хүн бүрт тохиолоо. Яг л энэ гар утас шиг ганган, хээнцэр, эрхэмсэг, сайхан бүсгүйтэй хамт селфи татуулж амжив. Хойд камер нь 16MP, урд камер нь 5MP тул зургийн чанар сайн юм билээ.

S6 Edge + гар утас 5,7 инч том, хос нумарсан дэлгэцтэй тул илүү том зайтай харагдаж, цэлийсэн дэлгэцэн дээр ажиллахад урамтай сайхныг мэдрүүлэв. Мөн зурагдах, хагарахаас хамгаалсан өндөр чанартай Gorilla Glass 4 шилээр бүтээсэн тул манай Монголын нөхцөлд тохирох юм билээ.

Эцэст нь дүгнэж хэлэхэд хүчин чадлаараа бусад загварын утаснаасаа илүү, Note загвар шигээ том дэлгэцтэй, хээнцэр, ганган, бат бөх гар утас ийнхүү Монголд нээлтээ хийлээ.

9-р сарын 7-оос эхлэн Юнителийн салбараас энэхүү утсыг авах боломжтой бөгөөд ЛИЗИНГИЙН таатай нөхцөл таныг хүлээж байна.