Исламын улс зэвсэгт бүлгийн толгойлогч Абу Бакр Аль Багдади Сирийн баруун хойд нутагт явуулсан Америкийн цэргийн ажиллагааны үеэр гурван хүүхдийнхээ хамт амиа егүүтгэсэн тухай АНУ-ын Ерөнхийлөгч Дональд Трамп ням гариг /2019.10.27/-т мэдэгдэв.
Тэрбээр мэдэгдэлдээ “Исламын улс бүлэглэлийн толгойлогч Абу Бакр Аль Багдади үхсэн. Бусдыг айлган сүрдүүлдэг байсан алуурчин өөрөө эцсийн мөчид хулчгар амьтан шиг уйлж, орилж хашгичин нохойн үхлээр үхсэн. Одоо дэлхий ертөнц илүү аюулгүй боллоо” хэмээн хэлсэн байна.
Тодруулбал, Сирийн баруун хойд Идлиб мужид АНУ-ын тусгай хүчнийхэн Бямба гарагт Багдадиг устгах ажиллагааны үеэр тэр биедээ зүүсэн тэсрэх бөмбөгийг дэлбэлж, дагуулж зугтсан гурван хүүхдийнхээ хамт амиа алдсан байна. Багдадигийн цогцос дэлбэрэлтийн улмаас танихын аргагүй болтлоо хэдэн хэсэг хуваагдсан байсан ч ДНК-ийн шинжилгээгээр түүний цогцос мөн болохыг тогтоосон байна.
Багдади нь Ирак, Сирийн бүс нутагт исламын эзэнт улс “Халифат”-ыг байгуулахыг зорьж байсан ба АНУ-ын түүний байршлыг зааж өгсөн хүнд 25 сая ам.доллар амлаад байсан юм. Түүнийг устгасан нь Осама Бин Ладеныг устгаснаас илүү ач холбогдолтой үйл явдал болсон гэж Трамп мэдэгдсэн ба Сириэс цэргээ татах шийдвэрээсээ болж нэр хүнд нь унаад байсан Трампын хувьд энэ удаагийн хэрэг явдал нэр хүндээ сэргээх завшаан болж байна гэж ажиглагчид дүгнэж байна.
Тусгай ажиллагааг зохион байгуулахад Орос, Турк, Сири, Иракийн засгийн газар дэмжлэг үзүүлсэн бөгөөд Багдадигийн цогцсыг Осама Бин Ладены адилаар далайн усанд хаяхаар шийджээ.
Эх сурвалж: BBC
