NEWS агентлаг энэ долоо хоногт Монголын түүхэнд өрнөсөн онцлох үйл явдлыг багцлан хүргэж байна

1924.10.24 Үндсэн хуулийн төсөл боловсруулах комиссыг Ардын Засгийн Газрын ерөнхий сайд Б.Цэрэндорж ахлуулан, шинэчлэн байгуулав.

1928.10.23 МАХН-ын VII Их хурал хуралдав. 192 төлөөлөгч оролцсон тус хурлаар Ардын хувьсгалыг гүнзгийрүүлэн хөгжүүлэх намын зорилтыг улам тодруулан заажээ. Мөн намын дотоод байдал ба зөрөлдөөний асуудлыг хэлэлцэж, хэсэг бүлэг намын идэвхтнийг “баруун оппортунист” хэмээн буруутгаж, намаас хөөж, намын “томчууд”-ын дунд цэвэрлэгээ хийжээ.

1959.10.27 БНМАУ-ын СнЗ-ийн орлогч дарга С.Лувсан АИХ-ын Тэргүүлэгчид ба Засгийн газрыг төлөөлөн хятадын гүүр барилгын хэсэг ажилчдад одон медаль, жуух бичиг зэрэг шагнал гардуулсан байна. 1958 онд БНХАУ-аас БНМАУ-д эдийн засаг, техникийн тусламж үзүүлэх гэрээний дагуу хятад ажилчид Монгол Улсад гурван гүүр барьжээ.

1961.10.22 Балбын Цог жавхлант ван Махендра Бир Бикрам Шах Дева, Цог жавхлант хатан Ратна Ражиа Дева Шах нар БНМАУ-д төрийн айлчлал хийв.

1961.10.27 БНМАУ Нэгдсэн үндэсний байгууллагын гишүүн болов. БНМАУ-ыг НҮБ-д элсүүлэх тухай Аюулгүйн Зөвлөлийн санамжийг Ерөнхий Ассамблейн 16 дугаар чуулганаар энэ өдөр хэлэлцжээ. Ёслолын хэлтсийн дарга чуулганы танхимд “МОНГОЛ” гэсэн хаяг тавьсан суудалд манай төлөөлөгчдийг урин суулгаснаар БНМАУ НҮБ-ын 101 дэх гишүүн болсон юм.

1981.10.27 БНМАУ-ын ус цаг уурын албаны ерөнхий газар болон БНХАУ-ын цаг уурын газрын төв хороо хамтран “Улаанбаатар-Бээжингийн цаг уурын мэдээ солилцох болон цаг уурын мэдээний сувгийн тухай протокол”-д гарын үсэг зурав.

1985.10.25 БНМАУ, Буркина Пасо улстай дипломат харилцаа тогтоов.

1989.10.24 ӨМӨЗО-ны Ардын Засгийн газрын тэргүүн Бөхөө БНМАУ-аас БНХАУ-д суугаа Элчин сайд Ю.Очиртой уулзав. Талууд БНМАУ-ын Хөх хот дахь Ерөнхий Консулын Газрыг дахин сэргээх болон холбогдох асуудлаар санал солилцов.

1992.10.21-25 Улаанбаатар хотноо зохион байгуулагдсан Хятад, Монгол, Орос гурван улсын хил тогтоох хэлэлцээрийг талууд үзэглэв.

1995.10.25 Монгол Улсын Хөдөлмөрийн баатар, Төрийн соёрхолт эмч А.Отгондалай нарын хүмүүс “Зэт” компанийн зоогийн газрын хоолноос хордлого авч, А.Отгондалай эмч нас баржээ. Энэ нь Монголд хүнсний аюулгүй байдлын баталгаа алдагдсаны жишээ болсон дуулиан байв.

1996.10.27 Мэгжид Жанрайсиг бурхныг шүншиглэж, аравнайлав. Их шүтээнийг анх 1913 онд бүтээсэн төрх, хэмжээгээр нь дахин бүтээж, Гандантэгчинлэн хийдэд залсан юм.

2013.10.21-22 Польшийн Ерөнхийлөгч Бронислав Коморовски Монгол Улсад айлчлав.

2013.10.25 Канад улсын Амбан захирагч Дэвид Жонстон Монгол Улсад айлчлав.