“Apple” корпорацийн хөгжмийн үйлчилгээ хөгжүүлэлтийн хэлтсийн удирдах албан тушаалтан Иан Рожерс ажлаасаа гарч буй тухайгаа мэдээлжээ. Түүний хариуцан ажиллаж, үйлчилгээнд нэвтрүүлээд буй “Apple music” тун амжилттай байгаа энэ үед ийнхүү ажлаа орхих болсон нь олныг гайхшруулж байна.

Тэрбээр “Apple” компани 2014 оны наймдугаар сард “Beats Electronics”-ийг гурван тэрбум ам.доллараар худалдаж авахад тус компанид нэгдэж, онлайн радио үйлчилгээг хариуцан ажилласан юм. Түүний гол ажил болох “Apple music” үйлчилгээ уран бүтээлчид, салбарын шинжээчдээс өндөр үнэлгээ аваад байгаа. Энэхүү үйлчилгээний тусламжтай хэрэглэгчид сарын 10 ам.долларын хураамж төлснөөр хүссэн дуу хөгжмөө шууд сонсох боломжтой ажээ. Мөн багц үйлчилгээний хүрээнд “Beats 1” радиог сонсох боломжтой юм.

Т.МӨНХ