Гаалийн ерөнхий газрын мэргэжилтнүүд ОХУ-ын иргэн их хэмжээний мөнгө гар тээшиндээ авч явсныг илрүүлжээ. Тодруулбал, “Чингис хаан” олон улсын нисэх буудалд өнгөрсөн шөнө /2019.10.10/ Сөүл-Улаанбаатар чиглэлийн онгоцоор ирсэн зорчигч болох ОХУ-ын иргэн Г.В.В-ийн гар тээшнээс их хэмжээний бэлэн валют илрүүлсэн байна.

ОХУ-ын иргэн Г.В.В нь гаалийн өндөр эрсдэлтэй зорчигчийн санд бүртгэлтэй байсан бөгөөд түүнийг “онилон” гаалийн мэргэжилтнүүд биечлэн шалгалт хийсэн байна. Ингэхэд 150 мянган ам.доллар буюу одоогийн ханшаар 400 сая гаруй төгрөг гаальд мэдүүлэлгүй бэлнээр авч явсан нь тогтоогдсон юм.

“Гаалийн тухай хууль”-иар Монгол Улсын хилээр таван сая хүртэл төгрөгтэй тэнцэх хэмжээний валютыг, “Мөнгө угаах болон терроризмыг санхүүжүүлэхтэй тэмцэх тухай хууль”-д 15 сая төгрөг хүртэл болон түүнтэй тэнцэх хэмжээний валютыг зорчигч Гаальд заавал мэдүүлэх үүрэгтэй юм.