Казахстаны нийслэл Астана хотод болж буй жүдо бөхийн ДАШТ-ий хоёр дахь өдрийн барилдаан Улаанбаатарын цагаар 14.00 цагт эхэллээ. Энэ өдөр эрэгтэйчүүдийн 66 кг(60 бөх), эмэгтэйчүүдийн 52 кг-ын жингийн барилдаанууд болж, медальтнууд тодорно.

Өнөөдөр манай дөрвөн жүдоч барилдахаас 66 кг-д хөдөлмөрийн баатар, дэлхийн аварга Х.Цагаанбаатар салхийг хагалсан. Тэрээр эхний тойрогт Аргентинийн П.Гонзалестай учраа таарсан бөгөөд дарах мэхээр цэвэр хожсон ч хоёрдугаар тойрогт ОХУ-ын Х.Камалд цэвэр ялагдлаа.

66 кг-д "D" хэсгийг тэргүүлсэн Д.Төмөрхүлэг эхний тойрогт гоц мөргөсөн бөгөөд хоёрдугаар тойрогт Сербийн В.Марког 3 минут 35 секундэд цэвэр хожлоо.

Эмэгтэйчүүдийн 52 кг-д А.Цолмон "В" хэсэгт, гавьяат тамирчин М.Бундмаа "С" хэсэгт багтсан. А.Цолмон эхний тойрогт хийлж, Канадын Г.Екатринатай барилдана.

Дэлхийн аваргад найм дахь удаагаа оролцож буй М.Бундмаа гавьяат эхний барилдаанаа АНУ-ын Д.Ажеликатай хийж, 37 секундэд цэвэр хожлоо.

Урьдчилсан барилдаан Улаанбаатарын цагаар 14.00 цагаас эхэлсэн бөгөөд тэмцээнийг ETV телевиз шууд дамжуулан үзүүлж байна.

Ч.БОЛОР