ОХУ-ын иргэдийн дунд явуулсан сүүлийн үеийн судалгаагаар олонх нь Хятадад элэгтэй боловч АНУ-д дургүй гэсэн дүн гарчээ. АНУ болон Оросын харилцаа хүйтэн дайнаас хойш хамгийн доод түвшинд хүрч муудсан нь иргэдийн хандлагад нөлөөлсөн бололтой. Ялангуяа АНУ-ын 2016 оны ерөнхийлөгчийн сонгуульд ОХУ-ыг хөндлөнгөөс нөлөөлж оролцсон гэх буруутгал нь харилцаанд сөргөөр нөлөөлсөн гэж үзжээ.

Хараат бус Левада төвийн явуулсан судалгаанд оролцсон гурван хүн тутмын хоёр нь Оросын хамгийн том дайсан нь АНУ гэж хариулсан байна. Харин судалгаанд оролцогчдын зөвхөн 12 хувь нь Хятадад дургүй гэсэн бол 54 хувь нь АНУ-д дургүй гэсэн хариу өгчээ. Түүнчлэн Оросын иргэдийн зүгээс Москвагийн баримталж буй гадаад бодлогыг дэмждэг гэсэн хариу өгсөн аж.

Судалгааг есдүгээр сарын 20-ноос 26-ны өдрүүдэд ОХУ-ын 52 бүс нутагт 1600 хүнийг хамруулан явуулсан байна.

Эх сурвалж: MOSCOW TIMES