16.17 цаг.

Эмэгтэй 48 кг: (40 бөх)

Дэлхийн аварга М.Уранцэцэг эхний тойрогт хийлсэн. Тэрээр хоёрдугаар тойрогт БНХАУ-ын Шие Шишиг 2 минут 53 секундэд цэвэр яллаа.

М.Уранцэцэг 2011 оны дэлхийн аварга, 2013 оны дэлхийн аваргын мөнгөн медальт Японы Харуна Асамитэй шөвгийн наймд үлдэхийн төлөө барилдах юм.

15.40 цаг.

Эрэгтэй 60 кг: (60 бөх)

Дэлхийн аварга Г.Болдбаатар эхний тойрогт хийлж, хоёрдугаар тойрогт Туркийн Бекир Озлутай барилдаж, юүко үнэлгээгээр яллаа. Тэрээр гуравдугаар тойрогт Изриалын бөх Аршански Артиомтай барилдахаар таараад байгаа бөгөөд түүнийг ялбал зооны аваргын төлөө хүч үзнэ.

Мөн энэ жинд барилдаж буй өсвөрийн дэлхийн аваргын хүрэл медальт, залуучуудын дэлхийн аваргын мөнгөн медальт Ц.Цогтбаатар "С" хэсэгт багтсан. Тэрээр эхний тойрогт Швейцарийн жүдоч Людовик Чаммартиныг, хоёрдугаар тойрогт Чехийн Павел Петриков нарыг цэвэр яллаа. Ц.Цогтбаатар 2013 оны дэлхийн аваргын хүрэл медальт БНСУ-ын Ким Вон Жинтэй барилдана.

Анх удаа Дэлхийн аваргыг зорьсон 19 настай Ц.Цогтбаатар эхний тойрогт Швейцарийн жүдоч Людовик Чаммартиныг 2 минут 40 секундэд сууж үүрэх мэхээр цэвэр яллаа.

Жүдо бөхийн насанд хүрэгчдийн 2015 оны Дэлхийн аварга шалгаруулах тэмцээн өнөөдөр Казахстаны Астана хотноо "Алау" ордонд эхэллээ. Дэлхийн аваргын эхний өдөр эрэгтэйчүүдийн 60 кг, эмэгтэйчүүдийн 48 кг-ын жингийн аваргууд тодорно.

Манай улсаас өнөөдөр эрэгтэйчүүдийн 60 кг-д дэлхийн аварга Г.Болдбаатар, өсвөрийн дэлхийн аваргын хүрэл медальт, залуучуудын дэлхийн аваргын мөнгөн медальт Ц.Цогтбаатар, эмэгтэйчүүдийн 48 кг-д дэлхийн аварга М.Уранцэцэг нар зодоглох юм. Мөн Казахстаны нэрийн өмнөөс барилдаж буй ОУХМ Г.Отгонцэцэг 48 кг-ын D хэсэгт багтжээ.

Ч.БОЛОР