Энэ сарын 21-ний өдөр 29 нас хүрсэн Усэйн Болт дэлхийн аваргын 9 дэх алтан медалиа хүртлээ.

Өмнөд хөршийн нийслэл Бээжин хотноо болж буй хөнгөнатлетикийн ДАШТ хоёр дахь өдрөө үргэлжиллээ. Энэ өдрийн хамгийн сонирхолтой төрөл эрэгтэйчүүдийн 100 метрийн гүйлт байсан бөгөөд Ямайкын Усэйн Болт 9.79 секундын амжилтыг үзүүлж, түрүүлсэн бол АНУ-ын Жастин Гэтлин (9.80)  мөнгө медаль хүртлээ. Харин АНУ-ын Трайвон Бромелл, Канадын Андре Де Грассе нар ижил 9,92 секундын амжилтыг үзүүлж, хүрэл медалийн тавцанд хамтдаа зогслоо.  

АНУ-ын Жастин Гэтлин

Бямба гаригт болсон урьдчилсан гүйлтэнд АНУ-ын Жастин Гэтлин 9,83 секундын амжилтыг үзүүлж, тэргүүлээд байсан бол Усэйн Болт (9.96) V байрт бичигдэж байсан. Гэвч өнөөдөр болсон шийдвэрлэх уралдаанд Болт илүү байж, өөрийн гол өрсөлдөгч болох Гэтлинийг ардаа орхиж чадлаа. (Видеог https://twitter.com/GMBDaily)

Энэ удаагийн ДАШТ-ий 47 төрлийн тэмцээн, уралдаанаас хамгийн сонирхолтой нь эрэгтэйчүүдийн 100 метрийн уралдаан байсан. Тэр дундаа олимп, дэлхийн дээд амжилтыг эзэмшиж буй Ямайкын Усэйн Болт, допингийн асуудлаас болж тэмцээнд оролцох эрхээ хоёр ч удаа хасуулаад байсан АНУ-ын Жастин Гэтлин нар олны анхааралд байлаа. Учир нь Болтыг ганц зогсоох хүн Гэтлин. Тэрбээр он гарснаас хойш Алмазан лигийн Доха, Лозанн, Ромын цувралд оролцохдоо 9.74, 9.75, 9.78 секундын амжилтаар түрүүлсэн юм.

Усэйн Болт өнгөрсөн жил зүүн хөлдөө мэс засал хийлгэснээс хойш нэг хэсэг тэмцээнд оролцоогүй. Хэдийгээр гэмтлээс эргэж ирээд удаагүй байгаа ч өнөө цагийн хамгийн хурдан хүн гэдгээ дахин нотоллоо. Энэ сарын 21-ний өдөр 29 нас хүрсэн Усэйн Болт дэлхийн аваргын 9 дэх алтан медалиа хүртэж байна. Олимпийн наадмын 6 алтан медальт тэрээр 2009 оны ДАШТ-д 9,58 секунд хурдалж, дэлхийн рекордыг шинэчилсэн юм.

Усэйн Болтын насанд хүрэгчдийн ДАШТ-д үзүүлсэн амжилт:

2007 он. Япон, Осака хот 200 м, мөнгө
2007 он. Япон, Осака хот 4х100 м, буухиа, мөнгө
2009 он. ХБНГУ, Берлин хот 100 м, алт
2009 он. ХБНГУ, Берлин хот 200 м, алт
2009 он. ХБНГУ, Берлин хот 4х100 м, буухиа, алт
2011 он. БНСУ, Тэгу хот 200 м, алт
2011 он. БНСУ, Тэгу хот 4х100 м, буухиа, алт
2013 он. ОХУ, Москва хот 100 м, алт
2013 он. ОХУ, Москва хот 200 м, алт
2013 он. ОХУ, Москва хот 4х100 м, буухиа, алт
2015 он. БНХАУ, Бээжин хот 100 м, алт

Дэлхийн аваргын хоёр дахь өдрийн дараах байдлаар Их Британи 2 алтан медаль хүртсэн амжилтаар тэргүүлж эхэлсэн бол АНУ(1+1+2), Герман(1+1+0), Ямайк(1+0+1), Польш(1+0+1) улс II-V байрт бичигдэж байна. 14 орон ямар нэгэн медаль хүртсэнээс БНХАУ хоёр мөнгөн медаль авсан амжилтаар VIII байрт жагсаж байна.

Ч.БОЛОР