Либертари үзлээс жийрхдэг шалтгаан – 9 | News.MN

Либертари үзлээс жийрхдэг шалтгаан – 9

Либертари үзлээс жийрхдэг шалтгаан

Либертари үзлээс жийрхдэг шалтгаан – 9

Манай сайт өмнө нь Философийн ухааны доктор Б.Батчулуунтай хамтран “Философийн булан”, “Либертари булан”-гуудыг эрхлэн гаргаж байсан билээ. Энэ удаа түүний 15 цуврал өгүүллийг тавих гэж байна. Доктор Б.Батчулуун энэ нийтлэлүүддээ Монгол дахь либертари үзэлд учирч буй саад, бэрхшээлийг философи, нийгмийн психологийн үүднээс задлан шинжилж буй тул өмнө нь эрхлэн гаргаж байсан “Философи” болон “Либертари” булангуудын үргэлжлэл хэмээн ойлгож болно. 7 хоног бүрийн Даваа, Баасан гаригт нийтлэгдэх өгүүллүүдийг таалан соёрхоно уу.


(БИЗНЭСИЙНХЭНТЭЙ ХОЛБООТОЙ ШАЛТГААН)

Тийм ээ, либертари үзэл хувийн өмчийг хамгаалдаг. Гэхдээ заавал том бизнэсмэнүүдийн хувийн өмчийг хамгаалдаг юм биш. Энэ ертөнц дээр өмчгүй хүн гэж байдаггүй. Хамгийн ядуу хүнд ч гэсэн хувийн өмч бий, түүний бие махбод, оюун ухаан, авьяас чадвар. Энэ бүгдээ өөрийнхөө төлөө ашиглах эрх бүх хүнд бий. Өмч өмчөө бий болгодог. Хүн эдгээрээ ашиглаж байж асар их баялаг, хөгжил, дэвшлийг бүтээж ирсэн.

Гэхдээ либертари үзэл хууль бус өмч, бизнэсийг хэзээ ч хамгаалдаггүй. Шударга бус, хууль бус замаар бий болсон зүйлс юуных нь капиталист өмч байх вэ дээ. Ийм замаар хуримтлагдсан бол бусдыг хохироож байдаг хулгай, дээрэм, луйвар.

Манай бизнэсийнхэн бүхнийг монголчилдог нөгөөх л зангаараа бизнэс, зах зээлийг бас л “монголчилсон”. Бизнэсийг шударга бус зүйл гэж ойлгуулсан (Энд хувийн өмчийг үзэн ядах коммунист үзэл суртлын нөлөө байгаа л байх). Хувийн өмчийг үзэн яддаг орчинд либертари үзлийг жинхэнэ утгаар нь ойлгуулах хэцүү л дээ.

Манай бизнэсийнхэн шударгаар өрсөлдөхөөс айж, төрийн протекционизм дор орохын тулд улс төрчдийг хахуульддаг. Лайзэс-фэйр байхгүй ээ, сураггүй. Лайзэс-фэйрийг алга болоход хамгийн гол үүрэг гүйцэтгэсэн хүмүүс бол эд өөрсдөө. Төрийн дэмжлэгтэй бизнэс гэдэг бол тэр чигээрээ социализм. Төр бизнэст оролцсон үед нийгэмд хамгийн хэрэгтэй, шударга бизнэс эрхлэгчид зах зээлээс шахагдаж, харин заль мэх, луйврын замаар явдаг бизнэснийхэн хождог. Макро түвшин, алс хэтдээ бол нийгэм бүхэлдээ хохирч байдаг.

Манай бизнэс эрхлэгчид хулгай, залилан их хийдэг. Хамгийн сонгодог жишээ, Жастын Батхүү. Төрийнхөн болон улсын өмчийнхөнтэй нийлж байгаад гадаадын банкийг зальдчихаж байгаа юм. Эндээс олон улсад үлдсэн хамгийн том эффект бол “монголчууд муухай зальтай, хулгайч, луйварчин зантай” гэсэн мессэж.

Монголын “Зууны луйварчин”

Манай бизнэсийнхэн хулгай хийх үнэхээр дуртай. Сиймхий л олдвол хулгай хийнэ. Тэд улсаас маш их хулгай хийдэг. Худлаа хэлж тэндэр авчхаад дандаа хулхи ажил хийнэ.

Бизнэсийнхэн өөрсдөдөө ажилладаг хүмүүсээс хүртэл хулгай хийнэ. Хийсэн ажлын хөлсийг нь бүрэн олгохгүй, зарим үед ерөөсөө өгөхгүй.

Бизнэсийнхэн хэрэглэгчдээсээ хулгай хийнэ. Бараа таваар, үйлчилгээгээ бодит үнэ, өртгөөсөө хамаагүй дээгүүр үнээр хэрэглэгчдэд зарна.

Ямар ч протекционизм байхгүй, бизнэсийн бүх үйл ажиллагаа шударга явагддаг, залилан мэхлэх огтоос боломжгүй нийгэм бий болгоё гэвэл хамгийн их айх хүмүүс чинь манай бизнэсийнхэн байгаа юм.

Монголын бизнэсмэнүүд социализмдаа хайртай гэж жигтэйхэн. Хачин юм шүү!!! Нэлээд том бизнэсмэн, капиталтан. Тэгсэн атлаа социализмд татагддаг. Эд болдогсон бол хуучин социализмынхаа үед ийм мөнгө, хөрөнгө, капиталтайгаа амьдрах юмсан гэж боддог байх. Ийм л абсурд феномен манайд л байгаа юм даа.

Үнэндээ, манай бизнэсийнхэн дотор зах зээлийн зүй тогтол, капиталын мөн чанарыг ойлгож бизнэс эрхэлдэг хүн маш цөөн дөө. Зүгээр л ямар ч хамаагүй аргаар мөнгөтэй болох, хөрөнгөжих гэсэн хээр талын феодал сэтгэлгээтнүүд.

Монгол бизнэсмэнүүд шударгаар өрсөлдөхөөс үхтлээ айна. Дандаа үгсэн хуйвалдана. Амраар нь ард түмнээ мөлжиж, хохироох замаар хэдэн төгрөг олж байх замыг сонгодог. Сонгодог жишээ нь, Монголын бензин импортлогчид.

Энэ бүхэн дээр нэрмээс болдог нэг хүчин зүйл бол 1990-ээд оны хувьчлал. 1990-ээд онд хувьчлал хэтэрхий шударга бус явагдсан. Тэдний өмчилж буй өмч бүгд социализмын үед бий болчихсон байсан, тэр зүйлийг хууль бус замаар хувьчилж авсан гэсэн ойлголт их тархсан.

Социализмын үед баригдсан эдгээр том объектууд 1990-ээд оны хувьчлалаар Монголын өнөөгийн Ерөнхийлөгч Х.Баттулгын хувийн өмч болсон юм.

“Либертари үзэл нь хувийн өмч, бизнэсийг хамгаалж, зах зээлийн талд зогсдог” гэж ойлгохдоо ийм шударга бус зүйлсийг хамгаалдаг гээд ойлгочихсон хүмүүс энэ үзэлд хэрхэн таатай хандах билээ. Хүмүүс минь ээ, та нар бизнэс, хувийн өмч, зах зээл гэдгийг Монголын хэдэн луйварчидтай хольж ойлгоод байна. Юу гэдэг билээ, “андуураад байна та, андуураад байна” гэдэг бил үү!

Б.БАТЧУЛУУН

"Болор дуран"-аар шалгав.
Энэ мэдээнд өгөх таны сэтгэгдэл?
11
ЗөвЗөв
1
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

Холбоотой мэдээ

11 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2019-10-04 66.181.181.243

буруу хүмүүст хувьчлал очоод гэмгүй хүмүүс гудманд гарсан

Avatar

Зочин 2019-10-04 66.181.185.19

Huviin omchguigeer mongo hevlegddeggui galt tereg mashin geh met huvisgaluud huviin omchtei humuus demjij amidrald heregjsen

Avatar

Бизнэс бол нийгмийн ажил 2019-10-04 64.119.18.234

Бизнэс бол мөнгө биш гэж доор хүн хэлжээ. Бизнэс бол хувь хүний сэдэл дээр тулгуурласан нийгмийн үйл хэрэг.

Avatar

Зочин 2019-10-04 103.9.88.162

Барууны орнууд одоо л бид социализм байгуулах зам руугаа орж эхэлж байна гэж ярьж байхад манайх одоо л барууны хуучин замаар явах гэж байдаг, мөн ч их хоцрогдож дээ. Монголчууд эргээд социализм байгуулж эхлэх хүртэл капитализмаар 50-100 жил явах хэрэгтэй болох байх даа

Avatar

зочин 2019-10-04 202.170.68.162

Өмнөх нийтлэлүүдэд нь шүмжлэлтэй хандаж байлаа. Энэ удаагийнх бол ёстой найс байлаа

Avatar

иргэн 2019-10-04 192.82.64.190

ЛИТБЕРТАРИ ҮЗЛЭЭ МОНГОЛЫН ХӨРСӨН БУУЛГАСАН ТУХАЙ СУДАЛГАА ХИЙЖ БАЙГААД БИЧИХ ХЭРЭГТЭЙ БАЙЖ ДЭЭ,,,,,,,,??? ТАНЫ ЯРИАД БАЙГАА ҮЗЛИЙГ ОЙЛГОХГҮЙ ӨӨРИЙНХӨӨРӨӨ БОДООД ДУУРАЙЖ ЖҮЖИГЛЭГЧ ЗАЛУУС ,УЛС ТӨРЧИД ,ТӨР ЗАСАГТ 1990 ОНООС ЭХЛЭН УХААНТАЙ ДҮРД ТОГЛОСНЫ ҮР ДҮН ШҮҮ ДЭЭ ,,,

Avatar

зочин 2019-10-04 150.129.143.69

Социализмын үеийн өмчгүй, бараг л өмчгүй байсан хүмүүс хэтэрхий өлөн ховдог болдог шиг байгаа юм, тэгээд боломж гарангуут хэт ховдоглодог, дээр нь монгол хүний онцлог бас нөлөөлсөн, монгол хүнийг Хегел хоёр туйлшралтай, нэг нь хэт зочломтгой, нөгөө нь дээрэмчин зантай гэсэн байдаг. Энэ хоёр шинж аль аль нь зах зээлд тохирохгүй, гэхдээ монголчууд зах зээлд тохирохгүй гэж байгаа юм биш, энэ муу талаа мэдэрвэл зүгээр сэн л гэж байгаа юм.
Сайхан өгүүлэл байна.

Avatar

Бизнэс мөнгө хоёр адилгүй 2019-10-04 203.91.116.98

Бид бизнэсийг ойлгодгүй л дээ. Мөнгө л гэж хардаг

Avatar

Zov 2019-10-04 49.0.184.42

Gaihaltai

Avatar

Бизнесийг барууныхан шиг хийвэл 2019-10-04 64.119.18.234

Монголд бизнесийг жамаар нь, шударгаар хийдэг хүн бараг байхгүй дээ. Уг нь бизнесийг барууны орнуудад хийдэг шиг хийвэл тэр хүндээ ч нийт ард түмэнд ч хэрэгтэй. Улс хөгжөөд явчихна

Avatar

Эмгэнэлтэй АМЬДРАЛ 2019-10-04 202.131.239.166

Нүүр бардам Энийг би Ариун цагаан замаар бүтээсэн гэх хүн Монголд цөөн бизээ. Соц. өмчийг хувьчлах үед шударга бусаар л бүгдийг зохион байгуулалттай авсан. Өгсөн хүний хохь, арга зальтайдаа авсан хүний аз тэр. Яг үүнийг манай Ерөнхийлөгч мөн хийж байгаа. Энэ хүн маш их мөнгөтэй, маш их эрх мэдэлтэй. Одоо бүүүүүр их эрх мэдэлд тэмүүлээд л явж байна. Энэ хүн хүссэнээ заавал авна байх. Яагаад гэвэл Ард түмэн гэдэг цагаан цаас, тиймээс юу ч бичиж болно. Тэд бүгдийг мартдаг. Тэд өлсгөлөн ядуу.

NewsMN Гар утасны хувилбар Татах
NEWS.mn

Мэдээллийн эх сурвалж