Америкийн Худалдааны сайд Уилбур Росс Дональд Трампыг НҮБ-ын Ерөнхий ассамблейн чуулган дээр үг хэлэх үеэр унтжээ. Сэтгүүлчдийн олонд ил болгосон дүрс бичлэгээс өдгөө 81 настай улс төрч нүдээ анин, улмаар толгойгоо гудайлган сууж байгаа нь тодорхой харагдаж буй аж. Сайд Росс Ерөнхийлөгч Трампыг Хятадтай худалдааны хэлэлцээр хийх боломжийн талаар хэлсэн чухал үед ийнхүү 15 минут орчим унтсан бол түүний хажууд суусан АНУ-ын дэд Ерөнхийлөгч Майк Пенс, Төрийн нарийн бичгийн дарга Майк Помпео нар Трампыг анхааралтай сонсжээ. Хэдийгээр Росс нүдээ нээсэн ч нойрмог харагдаж байсан аж.

Энэ тухай мэдээлэл хэвлэлд нийтлэгдсэнээс хойш нэг цагийн дараа Росс "Энэ бол гүтгэлэг" хэмээн мэдэгдсэн байна. Тэрбээр "Би Ерөнхийлөгч Трамп дэлхийн өнцөг булан бүрт тулгарч буй бүх чухал асуудлыг нарийвчлан тусгасан үгээ хэлж байхад анхаарлаа төвлөрүүлж байсан" хэмээн хэлжээ.

Россын хувьд энэ нь олон нийтийн арга хэмжээн дээр унтсан анхны тохиолдол биш аж. Тэрбээр 2017 онд Трампыг Саудын Арабт айлчлах үеэр түүний охин Иванка Трампаас холгүй суун, чихэвчээ зүүгээд унтаж байжээ.

Эх сурвалж: CNBC